Azadmedia.az Ermənistan hökumətinin mətbuat xidmətinə istimadən xəbər verir ki, Rusiya prezidenti Vladimir Putin və Ermənistanın baş naziri Nikol Paşinyan arasında Laçın yolundakı vəziyyət və Ermənistan-Azərbaycan münasibətlərinin nizamlanması prosesi müzakirə olunub.

“Həmsöhbətlər Laçın yolundakı vəziyyətə toxunublar”, - Nazirlər Kabinetinin Teleqram kanalında deyilir.

Putin və Paşinyan, həmçinin Ermənistan və Azərbaycan arasında münasibətlərin normallaşdırılması prosesi ilə bağlı fikir mübadiləsi aparıblar və Ermənistan, Rusiya və Azərbaycan liderləri arasında 9 noyabr 2020-ci il, 11 yanvar, 26 noyabr 2021-ci il tarixlərində imzalanmış üçtərəfli sazişlərin icrası barədə danışıblar.
Söhbətin Ermənistan tərəfinin təşəbbüsü ilə baş tutduğu qeyd edilir.

Kremlin mətbuat xidməti xəbər verir ki, Ermənistanın baş naziri fevralın 18-də Münhen Təhlükəsizlik Konfransı çərçivəsində Azərbaycan prezidenti ilə görüş barədə Rusiya prezidenti Vladimir Putini də məlumatlandırıb.

Paşinyan Putinə Münhendə digər xarici tərəfdaşlarla görüşləri barədə də danışıb.