Azərbaycan prezidenti İlham Əliyev bildirib ki, Xəzərdəki “Abşeron” yatağından ilk qazın bu il alınması planlaşdırılır. Azadmedia.az yerli kiv-lərə istinadən xəbər verir ki, o, bunu Şuşada keçirilən beynəlxalq konfransda deyib.

"Biz "Şahdəniz" yatağından daha çox qaz gözləyirik. Dörd ildən sonra, bəlkə də bundan əvvəl "Şahdəniz" yatağının yeni fazasından əlavə qaz gözləyirik. Biz də bu il "Abşeron" yatağından ilk qazı alacağımızı gözləyirik", - Əliyev deyib. .

Dövlət başçısı qeyd edib ki, “Abşeron” yatağının işlənməsinin birinci mərhələsi çərçivəsində ildə 1,5 milyard kubmetr qaz hasil ediləcək.

"Əlbəttə, "Azəri-Çıraq-Günəşli" yataqlar blokundan dərin qazın çıxarılması layihəsinin böyük potensialı var. BP və SOCAR artıq bunun üzərində fəal işləyirlər", - Əliyev deyib.

O, həmçinin qeyd edib ki, SOCAR-ın qismən işlədiyi “Ümid-Babək” dəniz yataqları bloku böyük potensiala malikdir.

"Lakin biz beynəlxalq şirkətlərlə də işləməyə hazırıq. Qarabağ neft yatağı haqqında da unutmaq olmaz ki, onun da potensialı var", - deyə prezident yekunlaşdırıb.