Konfransın məqsədi Braziliya Ciu-Citsu idman növü üzrə klub və filialların məşqçilərini bir araya gətirərək gələcək fəaliyyət planları, növbəti yarışların təşkili və təfərrüatların müzakirəsi olub. Konfransa Braziliya Ciu-Citsu idman növü üzrə bütün aidiyyatı şəxslər dəvət olunaraq ictimai birliyin nəzdindəki fəaliyyətləri çərçivəsində təklifləri və ideyaları dinlənilib.

Məlumat üçün qeyd edək ki, Azərbaycan Braziliya Ciu-Citsu Klubu İctimai Birliyi Beynəlxalq İdman Braziliya Ciu-citsu Assosiasiyasının Azərbaycanda yeganə və rəsmi nümayəndəsidir.

Konfransı çıxış sözü ilə açan Azərbaycan Braziliya Ciu-Citsu Klubu İctimai Birliyinin təsisçisi Taleh Həsənov birliyin qurulmasının bu idman növünün inkişafına böyük töfhələr verəcəyini bildirmiş, birliyin yaradılma məqsədi və gələcəyə dair planlar barədə məlumat vermişdir.
Azərbaycan Braziliya Ciu-citsu Klubu İctimai Birliyinin prezidenti Aqil Acalov öz çıxışında bu mötəbər gün münasibətilə bütün Braziliya Ciu-Citsu cameəsini təbrik etmiş, bugünə qədər pərakəndə şəkildə fəaliyyət göstərən klub və filialların birliyindən məmnunluğunu bildirmişdir.

Konfrans zamanı yeni idarə heyəti üzvlərinin təyinatı elan edilib. Beləki tanınmış Ciu-Citsu ustası Azər Beydullayev İctimai Birliyin sədr müavini, qara kəmər sahibi Nurəddin Daşdəmirov hakimlər kollegiyasının sədri, Əkbər Hacıyev No-gi versiyası üzrə baş məşqçi vəzifəsinə təyin edilib. Həmçinin ciu-citsu idman növü üzrə xüsusi xidmətləri olanlara ustad Taleh Həsənov tərəfindən diplomlar və təşəkkürnamələr təqdim olunmuşdur.

Daha sonra İctimai Birliyin sədr müavinləri Anar Səfərov və Azər Beydullayev, həmçinin hakimlər kollegiyasının sədri Nurəddin Hacıyev, baş məşqçi Əkbər Hacıyev də çıxışlarında gələcək perspektivlərdən danışaraq birliyin yaranmasının daha böyük uğurlara zəmin yaradacağını vurğulamışlar.