İpoteka və Kredit Zəmanət Fondu tərəfindən satmaq öhdəliyi ilə kirayə mexanizmi çərçivəsində paytaxtda yeni mənzillər vətəndaşlara təqdim olunur. Məlumata görə, Bakı şəhəri, Binəqədi rayonu, Cəfər Xəndan küçəsində yerləşən yaşayış kompleksində 237 tam təmirli mənzil seçimə çıxarılıb.
Təklif olunan mənzillər 1, 2 və 3 otaqlı olmaqla müxtəlif seçim imkanları yaradır. Aylıq ödənişlər isə 925 manatdan başlayır ki, bu da vətəndaşlar üçün daha əlçatan şərtlər formalaşdırır.
Bildirilib ki, mənzillərin seçimi 28 aprel 2026-cı il tarixində saat 15:00-dan etibarən açıq olacaq. Müraciətlər Elektron Hökumət İnformasiya Sistemi üzərindən inteqrasiya olunmuş elektron ipoteka sistemi vasitəsilə qəbul ediləcək.
Qeyd edək ki, bu günədək həmin mexanizm çərçivəsində artıq 9300-dən çox kirayə müqaviləsi imzalanıb ki, bu da proqramın geniş maraq doğurduğunu göstərir.