Mayın 8-də Baş nazirin müavini Şahin Mustafayevin rəhbərlik etdiyi Azərbaycan nümayəndə heyəti Rusiya Federasiyasının Həştərxan vilayətinə səfər edib.

Ümummilli lider Heydər Əliyevin 100 illik yubileyi ərəfəsində təşkil edilən səfərdə nümayəndə heyətinin tərkibində Azərbaycan Turizm Agentlikləri Asosiasiyasının İdarə Heyətinin sədri Göydəniz Qəhrəmanov da iştirak edib.

Səfər çərçivəsində ATAA sədri Həştərxan Vilayətinin iqtisadi inkişaf nazirinin müavini Leysan Raşitovna, “Həştərxan Turizm Liqası”nın turoperat və turagentlərin təşviqi Assosiasiyasının direktoru Alfiya Ryastamovna və bir sıra yerli turizm şirkətlərinin rəhbərləri ilə işgüzar görüş keçirib.

Görüşdə Göydəniz Qəhrəmanov turizmin inkişafı, Assosiasiyanın fəaliyyəti, ölkə turizminin inkişafındakı rolu və üzvlərinin sayı haqqında məlumat verib.

Görüş çərçivəsində iki ölkənin turizm təşkilatları arasında turizm əlaqələrinin inkişafı,əməkdaşlıq imkanları, birgə iş birliyinin yaradılması, qarşılıqlı biznes fəaliyyətinin təşkili məsələləri müzakirə edilib.

Həmçinin müzakirələr zamanı turizm agentlikləri və turoperatorlar arasında kommunikasiya və tərəfdaşlıq əlaqələrinin yaradılması, turizm məhsullarının təşviqi, turist cəlbediciliyinin artırılması məqsədi ilə turistik səfərlərin sayının artırılması, eləcə də turizm şirkətləri ilə B2B formatlı görüşlərin keçirilməsi, turizm sahəsində təcrübə mübadiləsinin aparılması və digər məsələlər ətrafında fikir mübadiləsi aparılıb.

Səfər şərçivəsində Ümummilli lider Heydər Əliyevin 100 illik yubileyi ilə bağlı bir sıra rəsmi tədbirlər və konsert proqramı təşkil edilib.

Qeyd edək ki, hazırda Bakı-Həştərxan-Bakı reysləri üzrə həftədə 5 dəfə olmaqla birbaşa uçuşlar həyata keçirilir.