Qlobal neft tələbatı 2045-ci ilə qədər gündə 110 milyon barrelə yüksələ bilər və bu tarixə qədər ümumi enerji tələbatı 23% artacaqdır. CNBC xəbər verir ki, bunu OPEK-in baş katibi Heysəm əl-Qais deyib.

“Neft yaxın gələcək üçün əvəzolunmazdır. Bizim proqnozumuza görə, biz görürük ki, 2045-ci ilə qədər neftə qlobal tələbat sutkada 110 milyon barrelə qədər artacaq”, - deyə Haysham əl-Qhais Malayziyanın paytaxtı Kuala-Lumpurda “Energy Asia” konfransının açılışında çıxışı zamanı bildirib.

Onun sözlərinə görə, 2045-ci ilə qədər neftin qlobal enerji balansında payı 29% səviyyəsində olacaq. Eyni zamanda, neft-qaz sənayesi üçün maliyyə çatışmazlığı enerji sistemlərinin təhlükəsizliyini təhlükə altına qoya və qlobal enerji xaosuna səbəb ola bilər.

O əlavə edib ki, gələcəkdə bərpa olunan enerji mənbələri dünyanın enerji balansında böyük rol oynayacaq. Eyni zamanda, bəzi OPEK ölkələri artıq bu istiqamətə külli miqdarda vəsait yatırmağa başlayıblar.

Daha əvvəl Beynəlxalq Enerji Agentliyinin (BEA) rəhbəri Fatih Birol bildirmişdi ki, yaxın gələcəkdə Hindistan neft istehlakına görə Çini liderlik mövqeyindən sıxışdıracaq. Yeni Dehli bu növ xammal üçün dünyanın ən böyük tələb artımı sürücüsü olacaq. Neft istehlakı baxımından qlobal liderlərin dəyişməsi növbəti dörd il ərzində - 2027-ci ilə qədər baş verəcək.