Falcon 9 raketi kainatın qaranlıq materiyasını öyrənmək üçün Avropa Kosmik Agentliyinin (ESA) Evklid teleskopunu uğurla orbitə çıxarıb. Azadmedia.az xəbər verir ki, bu barədə amerikan daşıyıcı tərtibatçısı SpaceX məlumat verib.

Buraxılış Florida ştatındakı Kanaveral burnunda ABŞ Kosmik Qüvvələrinin bazasındakı 40-cı buraxılış kompleksindən həyata keçirilib.

1 milyard avro dəyərində olan Avropa rəsədxanası qalaktikalar üzərində təfərrüatlı tədqiqatlar aparacaq və bu, qaranlıq maddə və qaranlıq enerji haqqında yeni məlumatlar təqdim edəcək. Kosmik gəmi Yerdən təxminən 1,5 milyon km uzaqlaşacaq. Alimlər rəsədxanadan ilk məlumatı 2024-cü ildə almağı gözləyirlər.

Alimlərin fikrincə, kainatın genişlənməsi və qalaktik superklasterlərin böyüməsi qaranlıq enerji və maddənin təsiri ilə bağlıdır, lakin bu fenomen tam öyrənilməyib.

Altı illik Evklid missiyası Yerdən on milyardlarla işıq ili uzaqlıqda yerləşən, gecə səmasının üçdə birindən çoxunu əhatə edən milyardlarla qalaktikanın şəkillərini çəkəcək və astronomlara kainatın necə genişləndiyini və kosmik strukturların böyüdüyünü öyrənməyə kömək edəcək.

Evklid 1,2 metr diametrli teleskop, optik kamera (Vis), spektrometr və yaxın infraqırmızı fotometr (Nisp) ilə təchiz edilmişdir. Bu alətlər qalaktikanın morfometrik, fotometrik və spektroskopik xüsusiyyətlərini öyrənmək üçün 3D təsvirlər yaratmağa kömək edəcək.