Azərbaycan tezliklə Fələstində məktəb tikintisinə başlayacaq. Azadmedia.az xəbər verir ki, bunu Azərbaycan Prezidenti İlham Əliyev Bakıda Fələstin Dövlətinin xarici işlər naziri Riyad Əl-Malikini qəbul edərkən deyib.

Azərbaycan Prezidenti Fələstinin Baş naziri Məhəmməd Ştayye ilə görüşü məmnunluqla xatırladı. Bu görüşdə Azərbaycan tərəfindən Fələstində məktəb tikintisi ilə bağlı müraciət edildiyini vurğulayan dövlətimizin başçısı buna müsbət cavab verildiyini və bu layihənin tezliklə həyata keçiriləcəyini bildirdi. Dövlət başçısı Azərbaycanın Fələstində diplomatik nümayəndəliyinin açılmasını müsbət addım kimi qiymətləndirib.

Riyad Əl-Maliki öz növbəsində Azərbaycanın Fələstində diplomatik nümayəndəliyinin açılması ilə əlaqədar minnətdarlığını bildirib. O, Azərbaycanın xarici işlər nazirinin Fələstinə səfərinin əhəmiyyətini vurğulayaraq, bu addımların Azərbaycan ilə Fələstin arasında ikitərəfli münasibətlərin inkişafına ciddi təkan verəcəyinə əminliyini ifadə edib.

Fələstinin xarici işlər naziri Azərbaycanın Qoşulmama Hərəkatında uğurlu sədrliyi münasibətilə təbriklərini çatdırıb. O qeyd edib ki, Fələstin xalqı Azərbaycanın Fələstinə göstərdiyi daimi humanitar yardımı və dəstəyi yüksək qiymətləndirir.

Riyad Əl-Maliki də Azərbaycanı ərazilərinin işğaldan azad edilməsi münasibətilə təbrik edib.

Söhbət zamanı beynəlxalq təşkilatlar çərçivəsində əməkdaşlıq və qarşılıqlı maraq doğuran digər məsələlər ətrafında fikir mübadiləsi aparılıb.