Azərbaycan Çində keçirilən beynəlxalq ticarət sərgisində öz məhsullarını təqdim edib. Azadmedia.az xəbər verir ki, bunu ölkənin iqtisadiyyat naziri Mikayıl Cabbarov sosial şəbəkədəki rəsmi səhifəsində yazıb.

“Qlobal xidmət ticarətinin inkişafına təkan verən yarmarka Azərbaycanın iqtisadi potensialı, investisiya imkanları və yerli məhsulların nümayişi üçün dəyərli platformadır”, - nəşrdə deyilir.

Qeyd edək ki, Mikayıl Cabbarovun rəhbərlik etdiyi nümayəndə heyəti hazırda Çində rəsmi səfərdədir. Səfər çərçivəsində Pekində Azərbaycan Ticarət Evinin açılışı və digər tədbirlərin keçirilməsi nəzərdə tutulur.

Xatırladaq ki, sentyabrın 1-də Azərbaycan Çinlə investisiya əməkdaşlığı haqqında saziş imzalayıb.

Bundan əlavə, Azərbaycanın iqtisadiyyat nazirinin rəhbərlik etdiyi nümayəndə heyəti Çin Xalq Respublikasına səfəri zamanı “Bir kəmər, bir yol” təşəbbüsü və perspektivli infrastrukturun inkişafı layihələri çərçivəsində əməkdaşlıq məsələlərini müzakirə edib.