Azərbaycan Dövlət Su Təsərrüfatı Agentliyinin “Azərsu” ASC və İsrailin milli su operatoru Mekorot Su Şirkətinin cümə günü Bakıda dəniz suyunun duzsuzlaşdırılması layihəsi çərçivəsində texniki məsləhət xidmətlərinin göstərilməsi haqqında saziş imzalanıb.

Dövlət Agentliyinin sədri Zaur Mikayılov “Azərsu” və “Mekorot Su” ASC-nin nümayəndələri arasında keçirilən görüşdə Azərbaycanda içməli su təchizatı və kanalizasiya sistemlərinin yenidən qurulması layihələrinin həyata keçirilməsində aparıcı dünya şirkətlərinin təcrübəsindən istifadə olunduğunu diqqətə çatdırıb.

Belə ki, paytaxtın və ətraf rayonların su təchizatının yaxşılaşdırılması məqsədilə dəniz suyunun duzsuzlaşdırılması yolu ilə içməli suyun istehsalı üzrə pilot layihəyə başlanılıb. Onun sözlərinə görə, bu istiqamətdə İsrail şirkətləri ilə əməkdaşlıq Azərbaycan üçün xüsusi əhəmiyyət kəsb edir.

Mekorot Su Şirkətinin Direktorlar Şurasının sədri Amir Lang bildirib ki, şirkət İsraildə içməli suya olan tələbatın 90%-ni təmin edir, istehlakçılara verilən suyun təxminən 60%-i dəniz suyunun duzsuzlaşdırılması yolu ilə əldə edilir.
Görüşdə içməli su təchizatı sektorunda gələcək əməkdaşlıq məsələləri ətrafında ətraflı fikir mübadiləsi aparılıb.