Bu il Cəbrayılda 240 MVt gücündə Şəfəq Günəş Elektrik Stansiyasının (GES) tikintisinə başlanılacaq. Azadmedia.az xəbər verir ki, bu barədə bazar ertəsi jurnalistlərə BP-nin Xəzər regionu üzrə xarici əlaqələr və kommunikasiyalar üzrə vitse-prezidenti Bəxtiyar Aslanbəyli bildirib.

“Hazırlıq işləri artıq yekunlaşır. Cəbrayıl rayonunda minatəmizləmə işləri tezliklə yekunlaşacaq. Artıq ilin ikinci yarısında təsdiqlənəcək yekun investisiya qərarı (FID) ilə bağlı yekun texniki və kommersiya aspektləri var. Bundan sonra günəş elektrik stansiyasının təməlinin qoyulması və tikintisinə başlanacaq”, - deyə B.Aslanbəyli bildirib.

“Şəfəq”in ilkin dəyəri 200 milyon dollar qiymətləndirilirdi, lakin bu il FİD imzalananda işin yenilənmiş dəyəri açıqlanacaq.

Həmçinin bu il bp, SOCAR və Azərbaycan İnvestisiya Şirkətinin bu layihədə iştirak payı açıqlanacaq.

Xatırladaq ki, 2023-cü il iyunun 3-də Azərbaycanın Energetika Nazirliyi ilə BP arasında Günəş elektrik stansiyasının tikintisi layihəsinin qiymətləndirilməsi və həyata keçirilməsində əməkdaşlığa dair İcra Sazişi imzalanıb. Sənəd təkcə “Şəfəq” elektrik stansiyasının tikintisinə deyil, həm də işğaldan azad edilmiş ərazilərdə “yaşıl” enerji zonasının yaradılmasında geniş iştiraka aiddir.

Günəş elektrik stansiyası 2025-ci ilin sonunda tikilib istifadəyə veriləcək.