Türkiyə türkmən qazının Azərbaycan, İran və Xəzər dənizi vasitəsilə ölkəyə nəqli variantlarını müzakirə edir. Bunu Türkiyənin enerji və təbii ehtiyatlar naziri Alparslan Bayraktar deyib.

“Türkmən qazı uzun illərdir gündəmimizdə olan məsələdir. Biz şəraitin yetişdiyi bir mərhələdəyik. Qazın çatdırılması üçün üç variant var. Bunlardan biri də türkmən qazının svop yolu ilə İran vasitəsilə Türkiyəyə ötürülməsidir. Digər variant isə İran və Azərbaycan üzərindən mübadilə yolu ilə Türkiyəyə gəlməsidir. Alternativ olaraq, Türkmənistan qazı Xəzər dənizindən keçən boru kəməri vasitəsilə Türkiyəyə tədarük edilə bilər ki, bu da mahiyyət etibarilə daha uzunmüddətli, daha davamlı və daha böyük gücə malikdir. Bütün bu variantlar nəzərdən keçirilir və ilkin olaraq Türkmənistandan 2 milyard kubmetrə qədər təbii qaz nəql oluna bilər”, - nazir bildirib.

Bayraktar Türkiyədə qaz ticarəti mərkəzinin yaradılması məsələsinə də toxunub.

“Türkiyə İstanbul maliyyə mərkəzi üçün qaz ticarəti platforması üzərində işləyir, ilk növbədə Qazprom ilə. Düşünürük ki, bu saytı qısa müddətdə istifadəyə verə biləcəyik”, - deyə Bayraktar qeyd edib.