Ankarada videobağlantı vasitəsilə İğdır-Naxçıvan qaz kəmərinin açılış mərasimi olub, bu barədə Azərbaycan prezidentinin mətbuat xidməti məlumat yayıb.

Tədbirdə Azərbaycan və Türkiyə prezidentləri İlham Əliyev və Rəcəb Tayyib Ərdoğan iştirak ediblər. Bundan əvvəl Azərbaycan dövlət başçısı Türkiyəyə səfərə gəlib.

Mərasimdə hər iki dövlətin rəhbərləri çıxış edib.

İlham Əliyev açılış nitqində bu günü Türkiyə-Azərbaycan münasibətləri tarixində mühüm gün adlandırıb.

“Burada qeyd olunduğu kimi, il yarım bundan əvvəl biz möhtərəm prezidentlə birlikdə Naxçıvanda bu qaz kəmərinin təməlini qoymuşuq və indi də bu açılış mərasimində iştirak edirik” - deyən Prezident vurğulayıb ki, bu gün Azərbaycan və Türkiyə irimiqyaslı layihələr həyata keçirir.