Türkiyə prezidenti Rəcəb Tayyib Ərdoğan cümə axşamı ölkəyə Qara dəniz qazının nəqlinə başlayıb. Mərasim Zonguldak vilayətindəki Filyos qaz emalı kompleksində baş tutub və Azadmedia.az xəbər verir ki, mərasim TRT telekanalı tərəfindən yayımlanıb.

“Bu gün biz eyni anda iki bayramı qeyd edirik - qarşıdan gələn Fitr bayramı və Qara dəniz qazının tədarükünün başlanması, Türkiyənin enerji müstəqilliyini əldə etməsi üçün mühüm addımdır. İlkin mərhələdə sutkada 10 milyon kubmetr qaz hasil edəcəyik. Layihənin tam gücünə çatması ilə biz ölkənin qaz tələbatının 30%-ni ödəyə biləcəyik. Bundan əlavə, layihə sayəsində Filyos və Zonguldakı mühüm enerji və texnoloji bazaya çeviririk”, - deyə Ərdoğan bildirib.

Türkiyə liderinin sözlərinə görə, Türkiyə xalqı il ərzində qazdan mətbəxdə istifadə ediləndə və isti su sərf olunanda pul ödəməyəcək. Bundan əlavə, respublika sakinləri evlərin qızdırılması üçün istifadə edilən zaman bir ay müddətinə pulsuz qaz alacaqlar.