BMT Təhlükəsizlik Şurası qapalı iclasdan sonra Fələstin-İsrail münaqişəsi zonasındakı vəziyyətlə bağlı heç bir bəyanat qəbul etməyib. Rusiya Federasiyasının BMT-dəki daimi nümayəndəsi Vasili Nebenzya jurnalistlərin Təhlükəsizlik Şurasının bəyanatının olub-olmaması ilə bağlı sualına mənfi cavab verib.
Maltanın daimi nümayəndəsi Vanessa Freyzer öz növbəsində bildirib ki, heç bir dövlət bəyanat layihəsi təklif etməyib, Təhlükəsizlik Şurasının bütün üzvləri HƏMAS-ın İsrailə hücumunu pisləyib.
BƏƏ-nin BMT-dəki daimi nümayəndəsi Lana Zəki Nuseibah bildirib ki, BMT-nin xüsusi əlaqələndiricisi Tor Vennesland münaqişə zonasındakı vəziyyətlə bağlı məruzə edib.
Onun sözlərinə görə, Təhlükəsizlik Şurasının bütün üzvləri atəşkəs və gərginliyin azaldılması üçün həm beynəlxalq, həm də ikitərəfli kanallardan istifadə etməlidirlər.
Şənbə günü səhər İsrail Qəzza zolağından görünməmiş raket hücumuna məruz qalıb. İsrail ordusunun mətbuat xidməti 3 mindən çox raket atıldığını bildirib. Bundan əlavə, HƏMAS döyüşçüləri kütləvi raket hücumlarından sonra İsrailin cənubundakı sərhəd bölgələrinə nüfuz ediblər.

Fələstinin HƏMAS hərəkatının hərbi qanadı şənbə günü İsrailə qarşı Əl-Əqsa tufanı əməliyyatını elan edib. İsrail Müdafiə Qüvvələri Qəzza zolağında HƏMAS-a qarşı Dəmir Qılınclar əməliyyatına başladığını elan edib. İsrailin baş naziri Benyamin Netanyahu xalqa müraciətində ölkənin müharibə vəziyyətində olduğunu bildirib və ehtiyatların geniş şəkildə səfərbər edilməsi əmrini verdiyini bildirib. İsrail hərbçiləri məskunlaşan əraziləri təmizləyir.

Son məlumatlara görə, münaqişənin gərginləşməsi nəticəsində 400-dən çox fələstinli həlak olub, daha 2,3 min nəfər yaralanıb. İsraildə 700-dən çox insan həlak olub, 2,2 mindən çox insan yaralanıb.