Azərbaycan Turizm və Menecment Universitetində (ATMU) Böyük qələbənin 4 illliyinə həsr olunmuş “8 Noyabr - Zəfər Tariximizin İnciləri” adlı tədbir keçirilib.
Universitetden Azadmedia.az-a bildirilib ki, Azərbaycan Respublikasının Milli Məclisinin nümayəndələri Ceyhun Məmmədov və Vüqar İskəndərov, rektor İlham Mədətov, tarix üzrə fəlsəfə doktoru Hacı Həsənov, universitetin şəhid məzunu Məhəmmədəli Həsənzadənin atası Hörmət Həsənzadənin, həmçinin ATMU-nun professor-müəllim heyəti və tələbələrinin iştirakı ilə keçirilən tədbir Azərbaycan Respublikasının Dövlət Himninin səsləndirilməsi ilə başladı, şəhidlərin əziz xatirəsi bir dəqiqəlik sükutla anıldı.
ATMU-nun rektoru İlham Mədətov təbrik-çıxışı ilə başlayan nitqində vurğuladı ki, 44 günlük müharibə və düşmən üzərində tarixi qələbə dövlətimizin rəhbərinin siyasətini, qətiyyətini nümayiş etdirməklə, həm də çətin gündə xalqımızın birliyini, əyilməzliyini ortaya qoydu. Müzəffər ordumuzun Azərbaycanın hərb tarixinə şanlı səhifə yazmaq bacarığına malik olduğunu sübuta yetirdi. Rektor bildirdi ki, Ali Baş Komandan İlham Əliyevin rəhbərliyi ilə qazanılan şanlı qələbə, torpaqlarımızın işğaldan azad edilməsi dövlətçilik tarixində xüsusi əhəmiyyət kəsb edir. İlham Mədətov gələn qonaqlara minnətdarlığını bildirərək, 8 noyabr “Zəfər günü” münasibətilə hər kəsi təbrik etdi və şəhidlərimizin ruhu qarşısında baş əydiyini, onlara uca tanrıdan rəhmət, ailələrinə isə səbr dilədiyini bildirdi.
Millət Vəkili Ceyhun Məmmədov çıxışında bildirdi ki, məhz Müzəffər Ali Baş Komandanın rəhbərliyi, sınmaz iradəsi və rəşadətli Azərbaycan Ordusunun yenilməzliyi, şücaəti sayəsində müqəddəs torpaqlarımız düşmən işğalından azad olundu. 30 illik yurd həsrətinə son qoyuldu. O, Azərbaycanın regional güc kimi mövqeyini gücləndirən Zəfər Günü qələbəsinin gələcək nəsillərə təsiri barədə düşüncələrini bölüşdü.
Tədbirin davamında millət vəkili Vüqar İskəndərov çıxış edərək noyabr ayının 8-ni qürur günümüz kimi tarixə yazan qəhrəman övladlarımıza əbədi təşəkkür borcumuzun olduğunu dedi. Millət vəkili Azərbaycan Respublikasının ərazi bütövlüyü uğrunda görülən işlərdən, dövlətin həyata keçirdiyi siyasətin əhəmiyyətindən və xalqın dəstəyinin vacibliyindən danışdı, gəncləri bu qələbənin nəticələrini qorumağa və ölkəmizin gələcəyinə töhfə verməyə çağırdı.
Tədbirdə çıxış edən tarix üzrə fəlsəfə doktoru Hacı Həsənov universitetin həyata keçirdiyi bu cür tədbirlərlə gənclər arasında milli ruhun və vətənpərvərliyin təbliğinə verdiyi əhəmiyyətindən bəhs etdi. O, Zəfər Gününün Azərbaycan xalqının tarixində dönüş nöqtəsi olduğunu vurğuladı, bu qələbənin əldə edilməsində Azərbaycan Ordusunun və şəhidlərimizin rolunu bir daha xatırlatdı.
ATMU-nun İctimai fənlər kafedrasının professoru Məhərrəm Zülfüqarlı isə Qarabağ müharibələrinin tarixi və Zəfər Gününə aparan proseslər haqqında geniş məlumat verdi. Professor Azərbaycanın tarixi torpaqları uğrunda mübarizənin əhəmiyyətindən, keçmiş münaqişələrin ölkəmizin dövlətçilik tarixində oynadığı roldan və bu zəfərin xalqın birliyi sayəsində qazanıldığından bəhs etdi.
Tədbirdə qeyd olundu ki, 44 günlük Vətən müharibəsində iştirak edən ATMU-nun 100-dən çox tələbə və məzunundan 60 nəfərə yaxını Ali Baş Komandan, Prezident İlham Əliyev tərəfindən müxtəlif medallarla təltif olunub. Şəhidlik zirvəsinə ucalan ATMU-nun məzunu Məhəmmədəli Həsənzadə ölümündən sonra bir sıra medallara layiq görülüb.
Tədbirdə həmçinin şəhidimiz haqqında və Zəfər tariximizi əks etdirən video-çarxlar nümayiş olundu.
Daha sonra panel müzakirəsi aparıldı. Qonaqlar tələbələrin suallarını cavablandıraraq, işğaldan azad olunmuş torpaqlarda turizmin inkişaf imkanları, perspektivləri və bu istiqamətdə görülən işlər barədə məlumat verdilər.
Sonda xatirə şəkilləri çəkildi.