Bakı, 1 noyabr, Azadmedia.az - 2025-ci il —

Azərbaycan təhsil məkanında önəmli bir hadisə baş verdi: Azərbaycan Respublikası Təhsil Cəmiyyəti İctimai Birliyinin (ARTC İB) 35 illik yubileyi Azərbaycan Texniki Universitetində təntənəli şəkildə qeyd olundu. Tədbirdə dövlət qurumlarının nümayəndələri, elm və təhsil xadimləri, ictimaiyyət üzvləri və ziyalılar iştirak etdilər.


Azadmedia.az xəbər verir ki, tədbir Azərbaycan Milli Konservatoriyasının İncəsənət Gimnaziyası xorunun ifasında Dövlət Himninin səsləndirilməsi ilə başladı. Ardınca Vətən uğrunda canından keçmiş şəhidlərin əziz xatirəsi bir dəqiqəlik sükutla anıldı.


Maarifin 35 illik yolu - bir ideyadan milli maarifçilik dalğasına…

1980-ci illərin sonlarında maarifçilik ideyalarının yüksəlişi fonunda formalaşan Təhsil Cəmiyyəti, 1990-cı illərin əvvəllərindən etibarən rəsmi fəaliyyətə başlayaraq Azərbaycanın təhsil həyatında mühüm rol oynamağa başladı.

Cəmiyyətin missiyası yalnız bilik və tədrisin keyfiyyətini artırmaqla məhdudlaşmır, həm də mənəvi-əxlaqi dəyərlərin qorunması, milli kimliyin möhkəmlənməsi və vətəndaş cəmiyyətinin inkişafına dəstək məqsədlərini daşıyır.

Bu 35 il ərzində Cəmiyyət minlərlə müəllim və tələbənin həyatına təsir göstərmiş, maarifləndirici layihələr, sosial təşəbbüslər və innovativ təhsil proqramları ilə ölkənin maarifçilik tarixində dərin iz qoymuşdur.


Təsisçi Nuğay Əliyev – ideyanı inama çevirən şəxsiyyət …

Tədbirdə Cəmiyyətin təməl ideyasının müəllifi və qurucusu Nuğay Əliyev bəyin maarifçilik sahəsindəki fədakar fəaliyyəti xüsusi minnətdarlıqla xatırlandı.
O, təhsilin dövlətin gələcəyi üçün strateji əhəmiyyət daşıdığını önə çəkərək, Cəmiyyətin təşkilatlanma prosesində böyük əzm və inam nümayiş etdirmiş, qısa zamanda təşkilatı həm milli, həm də beynəlxalq səviyyədə tanıtmışdır.

Murad Ağalarov: “Maarifçilik ənənəsi daim yaşadılmalıdır”

Təhsil Cəmiyyəti İdarə Heyətinin sədri Murad Ağalarov çıxışında Cəmiyyətin 35 illik fəaliyyət yoluna nəzər salaraq bildirdi ki, qurumun əsas məqsədi təhsilin keyfiyyətinin yüksəldilməsi, müəllim və tələbələrin inkişafına dəstək göstərilməsi, maarifçilik ənənələrinin qorunması və beynəlxalq əməkdaşlığın genişləndirilməsidir.

Murad müəllim qeyd etdi:
“Bu illər ərzində Təhsil Cəmiyyəti yalnız bir QHT kimi deyil, həm də maarifçilik düşüncəsinin daşıyıcısı və cəmiyyətə təsir edən ideoloji platforma kimi formalaşıb. Qarşımızdakı illərdə təhsildə innovativ yanaşmaların təşviqinə, eləcə də sosial rifahın artırılmasına yönəlmiş yeni layihələr həyata keçirəcəyik.”


Rafiq Xəlil: “Bu yubiley 35 illik mənəvi yolun təntənəsidir”

Təhsil Cəmiyyətinin sədr müavini, ictimaiyyətçi və sosial məsələlər üzrə ekspert Rafiq Xəlil öz açıqlamasında yubileyin dərin mənəvi əhəmiyyət daşıdığını vurğuladı:

“Bu yubiley təkcə bir tarix deyil, həm də 35 illik mənəvi yolun, əməyə və təhsil missiyasına həsr olunmuş bir həyat yolunun təntənəsidir. Təhsil Cəmiyyəti illərdir ki, maarifçiliyi sadəcə bir anlayış kimi deyil, həyat tərzi kimi təbliğ edir. Bizim məqsədimiz təkcə öyrətmək deyil, insanı düşünməyə, dəyərlərlə yaşamağa sövq etməkdir.”


Elm və Təhsil Nazirliyindən rəsmi təbrik mesajı:

Tədbirdə Elm və Təhsil Nazirliyinin İctimaiyyətlə Əlaqələr və Kommunikasiya şöbəsinin müdiri Səbuhi Rzazadə çıxış edərək, Cəmiyyətin müəllimlərin peşəkar inkişafına və tədrisin keyfiyyətinin artırılmasına verdiyi mühüm töhfələri yüksək qiymətləndirdi. Nazirlik adından Təhsil Cəmiyyətinə gələcək fəaliyyətində uğurlar arzulandı.


Polis Akademiyasından dəstək mesajı gəldi:

Daxili İşlər Nazirliyinin Polis Akademiyasının Dil hazırlığı kafedrasının rəisi, polis polkovniki Elçin Orucov, Akademiyanın rəisi general-mayor Canpolad Daanovun təbriklərini çatdıraraq bildirdi ki, Cəmiyyətin yubileyi Zəfər Günü ərəfəsində qeyd olunur və bu, xüsusi simvolik məna daşıyır.
O, Təhsil Cəmiyyətinin gənc nəslin formalaşmasında və vətənpərvərlik dəyərlərinin aşılanmasında mühüm rol oynadığını vurğuladı.

Elm və mədəniyyətin qovuşduğu məkan

Tarix elmləri doktoru, professor Fuad Məmmədov təhsilin mədəniyyətin ayrılmaz hissəsi olduğunu qeyd edərək, Cəmiyyətin maarifçilik istiqamətində gördüyü işləri yüksək dəyərləndirdi.
O, belə təşəbbüslərin gələcək nəsillərin formalaşmasında böyük əhəmiyyət daşıdığını vurğuladı.

Cəmiyyətin 1990-cı illərdəki sədr müavini Ağalar Əliyev isə çıxışında o dövrdəki maarifçilik təşəbbüslərini və Cəmiyyətin bugünkü uğurlarının təməlini qoyan fəaliyyətləri xatırlatdı.

Tədbir zamanı Cəmiyyətin 35 illik fəaliyyətini əks etdirən qısa video təqdimat nümayiş olunub. Daha sonra tədbir bədii hissə ilə davam edib.
Sonda Cəmiyyətin fəal üzvlərinə fəxri fərmanlar, yeni üzvlərə isə üzvlük vəsiqələri təqdim olunub.
Azərbaycan Respublikası Təhsil Cəmiyyətinin 35 illik yubileyi bir daha göstərdi ki, təhsil sadəcə bilik deyil — milli dirçəlişin, mədəni inkişafın və gələcəyin təminatıdır.
Cəmiyyət qarşıdakı illərdə fəaliyyətini daha da genişləndirməyi, yeni sosial layihələr həyata keçirməyi və beynəlxalq əməkdaşlığı gücləndirməyi planlaşdırır.

Ülkər Piriyeva