Böyük Britaniya parlamenti “Tobacco and Vapes Bill” qanununu qəbul edib. Qanuna əsasən, 1 yanvar 2009-cu il və daha sonra doğulan şəxslərə ömürlük siqaret satışı qadağan olunur. Bu barədə The Independent məlumat yayıb.
Qanunun məqsədi “tüstüsüz nəsil” formalaşdırmaqdır. Yeni qaydalar 17 yaş və daha kiçik şəxslərin tütün məhsullarına çıxışını tam məhdudlaşdırır. Qanun qüvvəyə mindikdən sonra hökumət tütün, elektron siqaret və nikotin məhsullarını daha sərt şəkildə tənzimləyə biləcək. Bu, həm dadlandırıcıların, həm də qablaşdırmanın nəzarətini əhatə edəcək.
Britaniyanın səhiyyə naziri bu qanunu “tarixi addım” adlandırıb və onun çox sayda insanın həyatını xilas edəcəyini bildirib. O, həmçinin qeyd edib ki, hökumət biznesə təsirləri azaltmaq üçün ticarət nümayəndələri ilə işləyir.
Bu qanun ölkənin uzun illərdir siqaretlə mübarizə siyasətinin davamıdır. Daha əvvəl də tütün reklamına məhdudiyyətlər qoyulub, standart qablaşdırma tətbiq edilib və siqaret alma yaşı artırılıb.