Koronavirusun yeni variantlarının yayılması ilə bağlı narahatlıq yenidən artıb. Qonşu İranda yoluxma hallarının çoxaldığı, ölüm faktlarının da qeydə alındığı bildirilir. Yeni alt ştamın daha sürətlə yayıldığı qeyd olunur.

Səhiyyə eksperti, tibb elmləri doktoru Adil Qeybulla “Xəzər TV”yə açıqlamasında bildirib ki, koronavirus pandemiyası bitsə də, virusun yayılması tam dayanmayıb. Onun sözlərinə görə, bu proses bir müddət də davam edə bilər.

Həkim-terapevt Gülnar Quliyeva isə koronavirusun yaratdığı yoluxma riskinin hələ də mövcud olduğunu bildirib.

Mütəxəssislərin fikrincə, “Omikron” ştamının yeni mutasiyalarının nə vaxt yox olacağını və ya virusun qrip kimi mövsümi xarakter alacağını indidən söyləmək mümkün deyil.

Hava-damcı yolu ilə yayılan infeksiya istənilən ölkədə yoluxma hallarının artmasına səbəb ola bilər. Bu baxımdan, İranda müşahidə olunan epidemioloji vəziyyətin Azərbaycanda da diqqətlə izlənilməsi əhəmiyyətlidir.