Hindistan, Rusiya prezidenti Vladimir Putinin yaxın günlərdə Nyu-Dehliyə edəcəyi səfər çərçivəsində yeni müdafiə sazişləri üzrə danışıqlara başlamağı planlaşdırır.

Bu barədə “Bloomberg“ agentliyi məlumat yayıb.

Məlumatda bildirilir ki, danışıqlar xüsusilə Rusiyadan qırıcı təyyarələrin və ən yeni raketdən müdafiə sistemlərinin alınmasını əhatə edir.

“Xüsusi və imtiyazlı strateji tərəfdaşlıq statusuna malik olan Hindistan və Rusiya beşinci nəsil Su-57 qırıcılarının mümkün tədarükünü, həmçinin S-500 hava hücumundan müdafiə sisteminin modernləşdirilmiş versiyasının alınması perspektivlərini müzakirə etməyə hazırlaşırlar”, – “Bloomberg“ bildirib.

Agentlik həmçinin qeyd edib ki, Hindistan və Rusiya arasında mümkün razılaşma Nyu-Dehlinin ABŞ-la ticarət danışıqlarını çətinləşdirə bilər, çünki ABŞ ənənəvi olaraq Hindistanın Moskva ilə müdafiə əməkdaşlığının genişlənməsinə qarşı çıxır və Rusiyadan silah alınmasından narahatdır.