Norveçin vəliəhd şahzadəsi Mette-Marit barəsində yeni qalmaqal gündəmə gəlib.

Azad media.az xəbər verir ki, yenicə yayımlanan sənədlər onun məhkum edilmiş cinsi cinayətkar Ceffri Epşteynlə flirt xarakterli məktublar mübadiləsi apardığını üzə çıxarıb. Yazışmalarda şahzadənin Epşteyni təriflədiyi və onun “beynini qıcıqlandırdığını” qeyd etdiyi bildirilir.

52 yaşlı Mette-Marit – vəliəhd şahzadə Haakonun həyat yoldaşı və kral Harald V-in gəlini – adının ötən həftə dərc olunan sənədlərdə yer almasından sonra Epşteynlə keçmiş dostluğuna görə üzr istəyib. Bu barədə BBC məlumat yayıb.
Məktublar göstərir ki, şahzadə Epşteynin şəxsi həyatı barədə məlumatlı olub. Belə ki, 2012-ci ildə Epşteyn Mette-Maritə məktub yazaraq gənc skandinav qadınlarla tanış olmaqda kömək istədiyini bildirib.

“Arvad axtarıram. Paris maraqlıdır, amma skandinavlara üstünlük verirəm”, – Epşteyn yazıb.
Şahzadə isə cavabında: “Hələ də sənin doğrudan da arvad axtardığın xəbərinin şokunu həzm etməyə çalışıram…” – deyə qeyd edib.

Başqa bir yazışmada Epşteyn Mette-Maritə elmi məqalə göndərərək zarafatla bunun onu əsəbiləşdirməyəcəyinə ümid etdiyini yazıb, çünki şahzadə “xəyallar ölkəsində yaşayır”. Mette-Marit isə cavabında: “Sən məni həmişə güldürürsən. Çünki beynimi qıcıqlandırırsan”, – ifadəsini işlədib.
Dərc olunan məktubların heç birində Mette-Marit Epşteynin insan alveri fəaliyyəti ilə əlaqələndirilmir. Norveç Kral Sarayı da şahzadənin Epşteynin şəxsi adasında heç vaxt olmadığını vurğulayıb.

Mette-Marit 2019-cu ildə Epşteyni 2011–2013-cü illərdə tanıdığını açıqlamışdı. Yeni sənədlərin yayılmasından sonra o, yenidən üzr istəyib.
“Buna görə dərin peşmançılıq hissi keçirirəm və bu, daşımalı olduğum bir məsuliyyətdir”, – şahzadə NRK telekanalına bildirib.

“Ona görə təəssüflənirəm ki, Ceffri Epşteynlə əlaqə saxlamışam. O, öz əməllərinə görə cavabdehdir, mən isə onun keçmişini kifayət qədər araşdırmamağıma və necə bir insan olduğunu vaxtında dərk etməməyimə görə məsuliyyət daşıyıram”, – deyə əlavə edib.
Qeyd edək ki, bu sənədlər Norveç kral ailəsini sarsıdan son qalmaqallardan biridir. Mette-Maritin əvvəlki münasibətindən olan oğlu Marius Borg Höybi hazırda Norveçin ən böyük davam edən cinayət məhkəmələrindən birində mühakimə olunur.
İctimai fiqur hesab edilməyən Höybi dörd qadına təcavüz, zorakılıq və sevgilisinə qarşı hədələr də daxil olmaqla 38 maddə üzrə ittiham edilir. Təqsiri sübuta yetirilərsə, onu 10 ildən artıq həbs cəzası gözləyə bilər.
Xroniki ağciyər xəstəliyi ilə mübarizə apardığı üçün uzun müddətdir ictimaiyyətdən uzaq olan Mette-Marit 2001-ci ildə vəliəhd şahzadə Haakonla evliliyindən bəri dəfələrlə mübahisə mövzusu olub. Cütlük musiqi festivalında tanış olub və həmin dövrdə Mette-Maritin məşhur, məhkum edilmiş insan alverçisi ilə əlaqədə olduğu bildirilirdi.