“Ayakve” birliyinin üzvü Menya Soqomonyan “NEWS.am”a müsahibəsində bildirib ki, hazırda müxtəlif qüvvələrlə müzakirələr aparılır, lakin hələlik hansı siyasi təşkilatlardan söhbət getdiyini açıqlaya bilməz.

Xatırladaq ki, fevralın 27-də “Birlik Qanadları” siyasi təşəbbüsünün rəhbəri Arman Tatoyan və “Ayakve” milli vətəndaş birliyinin koordinatoru Avetik Çalabyan əməkdaşlıq haqqında memorandum imzalayıblar. Sənəd Ermənistanın gələcəyi üçün vahid siyasi proqramın formalaşdırılması məqsədilə qüvvələrin birləşdirilməsini nəzərdə tutur.

Soqomonyanın sözlərinə görə, “Birlik Qanadları” və “Ayakve” seçkilərdə vahid siyahı ilə, bir blok çərçivəsində iştirak edəcək.

O qeyd edib ki, memorandumun imzalanması qərarı “Birlik Qanadları”nın irəli sürdüyü “ermənimərkəzli” yanaşmalarla bağlıdır. Bundan əlavə, təşəbbüs üzvlərinin keçdiyi yol və korrupsiya qalmaqallarında iştirak etməməsi də mühüm amil olub.

Soqomonyan qarşıdan gələn seçkilərin ölkə üçün mühüm dönüş nöqtəsi olduğunu vurğulayıb. Onun sözlərinə görə, seçkilərdən sonra ya dövlətin möhkəmləndirilməsi üçün imkan yaranacaq, ya da Ermənistan öz müstəqil simasını itirə bilər.

O bildirib ki, hazırda seçkilərdə iştirak edib-etməmək və hansı siyasi qüvvəyə səs vermək məsələsində qərarsız olan seçicilərin faizi kifayət qədər yüksəkdir. Onun fikrincə, “Ayakve” ilə “Birlik Qanadları”nın birləşməsi həmin elektorat üçün ümidverici alternativ ola bilər.

Soqomonyan əlavə edib ki, müxalifət səslərin parçalanmasına yol verməməli, yüksək seçici fəallığına nail olmalı və informasiya blokadasını yararaq siyasi dəyişikliklərə zəmin yaratmalıdır. O, həmçinin, səslərinin hakimiyyətdən uzaqlaşdırılmasına töhfə verəcəyi təqdirdə, baş nazir Nikol Paşinyanın hakimiyyətdən getməsi istiqamətində addımlar atmağa hazır olduqlarını bildirib.