Ukrayna Prezidenti Volodimir Zelenski ölkəni payıza qədər mürəkkəb bir dövrün gözlədiyini açıqlayıb.

Dövlət başçısı bildirib ki, yaxın aylarda – xüsusilə yaz və yay dövründə həm cəbhədə, həm də siyasi və diplomatik müstəvidə vəziyyət çətin olacaq. Onun sözlərinə görə, bu müddətdə Ukraynaya təzyiqlər arta bilər və döyüş meydanında gərginlik yüksələ bilər.

Zelenski qeyd edib ki, yay aylarında ABŞ-ın diqqəti daha çox daxili proseslərə, o cümlədən seçkilərə yönələcək. Bu isə beynəlxalq dəstəyin dinamikasına təsir göstərə bilər.

Prezident həmçinin vurğulayıb ki, Rusiya bu dövrdə fəaliyyətini daha da aktivləşdirə bilər. Onun sözlərinə görə, Moskva “bufer zona”nı genişləndirməyə çalışır və bu, xüsusilə Belarus istiqamətində də özünü göstərə bilər.

Bundan əlavə, Zelenski Ukraynanın keçmişdə nüvə silahından imtinasını böyük səhv kimi qiymətləndirib.
Ekspertlər hesab edirlər ki, bu açıqlama yaxın aylarda regionda hərbi-siyasi vəziyyətin daha da gərginləşə biləcəyinə işarə edir.