İran rəsmiləri Hörmüz boğazı ərazisində yeni hərəkət qaydalarının qüvvəyə mindiyini açıqlayıb. Bu barədə ölkənin İslam İnqilabı Keşikçiləri Korpusu (SEPAH) Hərbi Dəniz Qüvvələrinin komandanlığı məlumat yayıb.

Bildirilib ki, yeni qaydalara əsasən, qeyri-hərbi gəmilər yalnız İran tərəfindən müəyyən edilmiş marşrut üzrə hərəkət edə biləcək. Hərbi gəmilərin boğazdan keçidi isə əvvəlki kimi qadağan olaraq qalır.

Eyni zamanda qeyd olunub ki, bütün keçidlər yalnız SEPAH-ın Hərbi Dəniz Qüvvələrinin icazəsi ilə həyata keçiriləcək.

Açıqlamada vurğulanır ki, bu qaydalar bölgədə hərbi əməliyyatların dayandırılması və xüsusilə Livan ərazisində atəşkəsin təmin olunmasından sonra formalaşmış “nisbi sakitlik dövrü” çərçivəsində tətbiq edilir.