Yaxın Şərqdə davam edən müharibə qlobal lüks sənayesinə ciddi zərbə vurub. Xüsusilə Fars körfəzi regionu, hansı ki son illərdə Louis Vuitton və Hermès kimi brendlər üçün əsas inkişaf bazarlarından biri hesab olunurdu, hazırda turizmin və istehlak aktivliyinin kəskin azalması ilə mövqelərini itirir.
Məlumata görə, regionda satışlar sürətlə aşağı düşüb. Lüks seqment üçün bu, xüsusilə həssasdır, çünki burada əsasən yüksək gəlirli müştərilər üçün nəzərdə tutulmuş bahalı məhsullar — eksklüziv çantalar, zinət əşyaları və limitli kolleksiyalar satılırdı.

Şirkətlər yaranmış vəziyyətə uyğunlaşmağa çalışır. Zegna Group artıq malların bir hissəsini qeyri-sabit regiondan çıxararaq London və Paris kimi daha stabil bazarlara yönləndirir. Şirkət rəhbərliyi hesab edir ki, regionu tərk edən müştərilər alışlarını başqa ölkələrdə davam etdirəcək.
Bununla belə, Fars körfəzi ölkələrində vəziyyət hələ də gərgindir. Turist axını demək olar ki, dayanıb, ABŞ, İsrail və İran arasında əldə olunan müvəqqəti atəşkəs isə sabitlik yaratmayıb.

Buna baxmayaraq, lüks şirkətlər regiondan uzunmüddətli perspektivdə imtina etmirlər. Müharibədən əvvəl bu bazarda illik artım tempi təxminən 8% təşkil edirdi və analitiklər gələcəkdə bərpa potensialının qalacağını düşünürlər.

Brunello Cucinelli isə regionda mağaza ziyarətlərinin 50%-ə qədər azaldığını bildirsə də, genişlənmə planlarını davam etdirir. Şirkət rəhbərliyi Yaxın Şərqi gələcək inkişaf üçün mühüm istiqamət kimi görür.

Ekspertlərin fikrincə, qlobal lüks bazarında böhranlar müvəqqətidir — turizm və satışlar azalsa da, yüksək gəlirli müştərilərin maliyyə imkanları qalır və bu, bazarın gələcəkdə yenidən canlanacağına ümid yaradır.