ABŞ-da Pentaqon 2027-ci il üçün müdafiə büdcəsi çərçivəsində pilotsuz uçuş aparatları (PUA), hava hücumundan müdafiə sistemləri və qırıcı təyyarələrə on milyardlarla dollar ayrılmasını təklif edib.
Məlumata görə, bu təşəbbüs Donald Trump administrasiyasının müdafiə xərclərini 1,5 trilyon dollara qədər artırmaq planının bir hissəsidir. Pentaqon xüsusilə PUA və əlaqəli texnologiyalara ayrılan vəsaiti üç dəfə artıraraq 74 milyard dollardan çoxa çatdırmaq niyyətindədir.

Bundan əlavə, 30 milyard dollardan artıq vəsait raketlər və digər mühüm sursatların alınmasına yönəldiləcək. Son illərdə bu ehtiyatların kəskin azaldığı qeyd olunur. Xüsusilə hava hücumundan müdafiə üçün istifadə edilən Patriot və THAAD sistemlərinə aid raketlərin çatışmazlığı diqqət mərkəzindədir.
Rəsmi şəxslər bildiriblər ki, bu sistemlər yalnız ballistik raketlərə qarşı deyil, həm də daha ucuz pilotsuz aparatların məhv edilməsində geniş istifadə olunub. Büdcədə həmçinin uzaqmənzilli dəqiq zərbə raketləri və orta mənzilli raket komplekslərinin alınması da nəzərdə tutulur.

Ümumilikdə, təklif olunan vəsaitin təxminən 54 milyard dolları hərbi PUA-lara, 21 milyard dolları isə düşmən dronlarına qarşı mübarizə sistemlərinə ayrılacaq.

Pentaqon rəsmiləri vurğulayıblar ki, müasir müharibələrdə, xüsusilə Ukrayna və Yaxın Şərqdəki münaqişələr fonunda, pilotsuz texnologiyalar əsas rol oynamağa başlayıb. Onların sözlərinə görə, dron müharibəsi sürətlə dəyişir və bu sahəyə qoyulan investisiyalar ABŞ tarixində ən böyük həcmdə olacaq.
Eyni zamanda, büdcə planına əsasən ABŞ Silahlı Qüvvələrinin şəxsi heyətinin 44 500 nəfər artırılması, ABŞ–Meksika sərhədində əməliyyatlara 2 milyard dollardan çox vəsait ayrılması və 1962-ci ildən bəri ən böyük gəmiqayırma proqramının həyata keçirilməsi də nəzərdə tutulur.