Human Rights Watch bildirib ki, Birləşmiş Ərəb Əmirlikləri Sudanda döyüşmək üçün kolumbiyalı muzdlulara hərbi təlim keçib. Hüquq müdafiə təşkilatının yaydığı yeni hesabatda iddia olunur ki, həmin şəxslər Sudandakı “Sürətli Dəstək Qüvvələri”nin (RSF) tərəfində iştirak etmək məqsədilə hazırlanıb.
HRW-nin hesabatı BƏƏ-ni RSF-yə maliyyə və hərbi dəstək göstərməkdə ittiham edən beynəlxalq hüquq müdafiə qurumlarının açıqlamalarını daha da gücləndirib. Xatırladaq ki, Sudandakı bu silahlı qruplaşma hərbi cinayətlər, insanlığa qarşı cinayətlər və soyqırımı xarakterli zorakılıqlarda ittiham olunur.
BƏƏ Xarici İşlər Nazirliyi isə Associated Press agentliyinin sorğusuna cavab olaraq ittihamları qəti şəkildə rədd edib.
HRW-nin Afrika bölməsinin icraçı direktoru Mausi Segun bildirib ki, kolumbiyalı özəl hərbi müqaviləçilərin cəlb olunması BƏƏ-nin RSF-yə hərbi dəstək verdiyinə dair sübutların artdığını göstərir.
Hesabatda qeyd olunur ki, yüzlərlə kolumbiyalı muzdlunun Əbu-Dabidən təxminən 250 kilometr qərbdə yerləşən Əl-Dafra hərbi bazasında, eləcə də paytaxtdakı digər obyektlərdə əmirlikli təlimatçılar tərəfindən hazırlandığı iddia edilir. Daha sonra onların Sudana göndərilərək RSF qüvvələrini gücləndirdiyi vurğulanır.
HRW həmçinin anonim kolumbiyalı döyüşçünün ifadəsinə istinad edib. O bildirib ki, ötən ilin aprel ayında Cənubi Darfur əyalətinin mərkəzi olan Nyala ətrafındakı düşərgələrdə RSF üçün yeni döyüşçülərə təlim keçib. Muzdlunun sözlərinə görə, həmin düşərgələrdə olan bəzi şəxslər “çox azyaşlı uşaqlar” olub.
Təşkilat əlavə edib ki, araşdırma çərçivəsində digər kolumbiyalı müqaviləli döyüşçülər və Kolumbiya Silahlı Qüvvələrinin keçmiş zabitləri ilə də müsahibələr aparılıb.