İspaniyada may ayında ölkənin sahil zolağının böyük hissəsində dəniz suyunun temperaturu üzrə rekord göstəricilər qeydə alınıb.
İspaniya liman hakimiyyətlərinin yaydığı məlumata görə, 15 dərin dəniz şamandırasından 12-si müşahidələr tarixində ən yüksək may temperaturunu qeydə alıb. Sahilyanı şamandıralar arasında isə 14 nöqtədən 6-da rekord göstəricilər müşahidə olunub.
İspaniyanın dövlət meteorologiya xidməti – AEMET-in nümayəndəsi Ruben del Campo bildirib ki, bu vəziyyətin əsas səbəbi insan fəaliyyəti nəticəsində baş verən iqlim dəyişiklikləridir.
Meteoroloqun sözlərinə görə, son on ildə cəmi 7 rekord soyuq gün qeydə alındığı halda, rekord isti günlərin sayı 221-ə çatıb. Bu isə qlobal orta temperaturun davamlı şəkildə artdığını göstərir.
Ruben del Kampo həmçinin vurğulayıb ki, may ayında müşahidə olunan rekord dəniz temperaturu hazırda formalaşmaqda olan El-Ninyo hadisəsi ilə əlaqəli deyil. BMT-nin proqnozlarına əsasən, El-Ninyo hadisəsinin yaxın aylarda Sakit okeanda formalaşması və oktyabr-noyabr aylarında pik həddə çatması gözlənilir.
Mütəxəssislər hesab edirlər ki, dəniz suyunun temperaturunun yüksəlməsi dəniz ekosistemlərinə, balıqçılığa və sahilyanı bölgələrin iqlim şəraitinə ciddi təsir göstərə bilər.