Latviyanın Milli Silahlı Qüvvələri (NVS) Aluksne rayonunda pilotsuz uçuş aparatlarının (PUA) mümkün hücumu ilə bağlı xəbərdarlıqdan sonra NATO-nun Baltik hava patrulu missiyasında iştirak edən qırıcı təyyarələri döyüş hazırlığı vəziyyətinə gətirib.

Bu barədə Latviyanın dövlət yayımçısı LSM Milli Silahlı Qüvvələrə istinadən məlumat yayıb.

NVS tərəfindən əhaliyə göndərilən xəbərdarlıqda deyilir:

“Latviyanın hava məkanına mümkün təhlükə barədə məlumat veririk. Hazırda əlavə tədbirlərin görülməsinə ehtiyac yoxdur. Vəziyyət dəyişərsə, tələb olunan tədbirlər barədə əlavə bildiriş alacaqsınız.”

Məlumata görə, həyəcan siqnalı yerli vaxtla saat 04:59-dan 06:25-dək davam edib. Bu müddətdə vətəndaşların mobil telefonlarına ölkənin hava məkanında mümkün təhlükə barədə bildiriş göndərilib.

Xatırladaq ki, mayın 7-də Latviyanın şərqində yerləşən Rēzekne şəhərində neft bazasının ərazisinə pilotsuz aparat düşərək dörd yanacaq çəninə ziyan vurmuşdu.

Həmin dövrdə Latviyanın müdafiə naziri vəzifəsini tutan Andris Sprūds bildirmişdi ki, ilkin məlumatlara əsasən, respublika ərazisinə Ukrayna istiqamətindən Rusiyaya doğru hərəkət edən dronlar daxil olmuş ola bilər.

Öz növbəsində, Rusiya Müdafiə Nazirliyi bəyan etmişdi ki, Ukrayna Silahlı Qüvvələrinin Sankt-Peterburq yaxınlığındakı mülki infrastruktur obyektlərinə hücum cəhdi zamanı Latviyanın hava məkanında altı pilotsuz aparat aşkar edilib.

Hadisə Baltik regionunda hava təhlükəsizliyi məsələlərinin yenidən gündəmə gəlməsinə səbəb olub və NATO qüvvələrinin bölgədəki hazırlıq səviyyəsinin artırıldığını göstərir.