ABŞ Müdafiə Nazirliyinin qərargahı olan Pentaqon binasında aşkarlanan hava keyfiyyəti problemi səbəbindən bir neçə mərtəbə müvəqqəti olaraq bağlanıb. Hadisə yerinə təhlükəli maddələrə qarşı fəaliyyət göstərən xüsusi qruplar cəlb olunub.
Pentaqonun sözçüsü Şon Parnell bildirib ki, binanın monitorinq sistemləri hava keyfiyyəti ilə bağlı araşdırılmalı olan bir problem müəyyən edib. Onun sözlərinə görə, vəziyyətin əhəmiyyəti dəqiqləşdirilənədək ehtiyat tədbirləri həyata keçirilir.

“Binanın sistemləri hava keyfiyyəti ilə bağlı tədbir görülməsini tələb edən bir problem aşkar edib. Məsələnin mahiyyəti müəyyən edilənədək departament standart təhlükəsizlik protokollarını tətbiq edir və təsirlənmiş ərazidə əməkdaşlara yerində sığınmaq göstərişi verilib”, – deyə Parnell vurğulayıb.
Hadisəyə müdaxilə üçün Arlington Yanğın və Təcili Tibbi Yardım Xidməti də cəlb olunub. Qurum sosial şəbəkələrdə yaydığı məlumatda təhlükəli maddələrlə bağlı insidentə reaksiya verdiyini açıqlayıb.

ABŞ mediasının məlumatına görə, binada xidmət aparan polis əməkdaşları qaz maskaları və tam kimyəvi mühafizə geyimləri ilə təchiz olunublar.

Qeyd edək ki, Pentaqon ABŞ Müdafiə Nazirliyinin əsas qərargahıdır və burada 20 mindən çox dövlət qulluqçusu çalışır. Hadisənin səbəbləri araşdırılır, indiyədək zərərçəkənlər barədə məlumat verilməyib.