Keçilər gözlənilməz idrak qabiliyyətinə malik ola bilər. Beynəlxalq alimlər qrupunun Royal Society Open Science jurnalında dərc olunan yeni araşdırmasına görə, bu heyvanlar gizlədilmiş qidanı tapmaq üçün insan səsinin gəldiyi istiqamətdən ipucu kimi istifadə edə bilirlər.

İndiyədək hesab olunurdu ki, bu bacarıq əsasən insanlarda və ev itlərində müşahidə olunur. Maraqlıdır ki, insanın ən yaxın təkamül qohumları olan şimpanzelər belə bu tip tapşırıqları yerinə yetirməkdə ciddi çətinlik çəkirlər. Bir çox heyvan səslərə reaksiya versə də, onlar adətən səsin istiqamətindən çox, onun məzmununa diqqət yetirirlər.

Tədqiqat Böyük Britaniyadakı sığınacaqda yaşayan 29 keçi üzərində aparılıb. Alimlər taxta arakəsmənin arxasında yerləşdirilmiş iki qırmızı qabdan istifadə ediblər. İlk mərhələdə keçilər öyrədilib: tədqiqatçı onların adını çağıraraq gözləri qarşısında yeməyi qablardan birində gizlədib.

Daha sonra əsas sınaqlar başlayıb. Tədqiqatçılardan biri keçilərə görünmədən qablardan birinə yem yerləşdirib. Heyvan otağa buraxıldıqdan sonra arakəsmənin arxasında dayanan digər tədqiqatçı müxtəlif səs siqnalları verib. O, ya səsini yem olan qaba doğru yönəldib, ya əks istiqamətə danışıb, ya da ümumiyyətlə susub.

Nəticələr göstərib ki, səs düzgün qaba yönəldildikdə keçilər təxminən 60 faiz hallarda yem olan qabı seçiblər. Tədqiqatçı susduqda düzgün seçim göstəricisi 47 faiz, səs əks istiqamətə yönəldildikdə isə 49 faiz olub. Bu da heyvanların qidanı qoxuya görə deyil, əsasən səsin istiqamətinə əsaslanaraq tapdıqlarını göstərir.

Alimlər hesab edirlər ki, bəzi keçilər insan nitqinin istiqamətini faydalı ipucu kimi qiymətləndirə bilirlər. Bu isə onların sosial qavrayış səviyyəsinin əvvəl düşünüləndən daha yüksək olduğunu və uzunmüddətli əhliləşdirmə prosesinin insanın ünsiyyət siqnallarına həssaslığın formalaşmasına təsir göstərə biləcəyini göstərir.

Tədqiqat müəlliflərinin fikrincə, keçilər sadəcə səsə reaksiya vermir, həm də onun məkan istiqamətini nəzərə ala bilirlər. Bu xüsusiyyət onların davranış baxımından itlərə və hətta kiçik uşaqlara bənzər idrak qabiliyyəti nümayiş etdirdiyini göstərir.