İtaliya hökuməti NATO-nun baş katibi Mark Ruttenin ölkədə yerləşən ABŞ hərbi bazalarının İran əleyhinə əməliyyatlarda istifadəsi ilə bağlı səsləndirdiyi fikirləri tənqid edib.
AFP agentliyinin məlumatına görə, Rutte ABŞ prezidenti Donald Trumpın NATO müttəfiqlərinə yönəlmiş tənqidlərini şərh edərkən bildirib ki, Avropa faktiki olaraq ABŞ-ın hərbi gücünü nümayiş etdirməsi üçün platforma rolunu oynayır. O, İranla müharibə zamanı yüzlərlə Amerika təyyarəsinin İtaliyadakı bazalardan havaya qalxdığını, Avropadakı bazalardan isə ümumilikdə minlərlə uçuş həyata keçirildiyini qeyd edib.

Ruttenin sözlərinə görə, əməliyyat zamanı təxminən 500 ABŞ təyyarəsi İtaliyadakı bazalardan istifadə edib, Avropa ərazisindən həyata keçirilən döyüş uçuşlarının sayı isə 4-5 min arasında olub.
Lakin İtaliyanın Müdafiə Nazirliyi bu açıqlamaların yanlış təsəvvür yaratdığını bildirib. Nazirliyin bəyanatında vurğulanıb ki, Roma yalnız mövcud sazişlər çərçivəsində ABŞ-a texniki və logistik xarakterli uçuşlar üçün icazə verib, döyüş əməliyyatlarına isə razılıq verməyib.
İtaliya tərəfi qeyd edib ki, bu çərçivədən kənara çıxan hər hansı müraciət hökumət tərəfindən təsdiqlənməyib. Belə qərarların qəbul edilməsi üçün ayrıca razılaşdırma və parlament nəzarəti tələb olunur.

Daha sonra NATO məsələ ilə bağlı açıqlama yayaraq, Ruttenin dediklərinin məhz texniki və logistik dəstəyə aid olduğunu, İtaliyanın döyüş əməliyyatlarında birbaşa iştirakını nəzərdə tutmadığını bildirib.

Məlumatda həmçinin qeyd olunur ki, ABŞ və İtaliya arasında İran məsələsi fonunda müəyyən gərginlik müşahidə edilir. Daha əvvəl Tramp Romanı Vaşinqtonun İrana qarşı fəaliyyətlərinə kifayət qədər dəstək verməməkdə ittiham etmiş, bu isə İtaliyanın Baş naziri Giorgia Meloni ilə ABŞ administrasiyası arasında ictimai polemikaya səbəb olmuşdu.