Almaniyada Cənubi Amerikadan gətirilmiş invaziv nutriyaların sürətlə çoxalması ölkənin yerli ekosistemi üçün ciddi təhlükə yaradıb. Bu barədə Bild qəzeti German Hunting Association-ın (DJV) məlumatlarına istinadən xəbər yayıb.

Məlumata görə, Cənubi Amerikadan olan nutriyalar Almaniyada təbii düşmənlərinin olmaması səbəbindən sürətlə yayılır. Mütəxəssislər bildirirlər ki, bu gəmiricilər qamışlıqları məhv edir, nəticədə bir çox quş, balıq və suda-quruda yaşayan canlı növlərinin yaşayış mühiti təhlükə altına düşür.

Bundan əlavə, nutriyaların bənd və sədlərdə qazdıqları yuvalar daşqınlardan mühafizə sistemlərinin dayanıqlığını zəiflədir və daşqın riskini artırır.

DJV-nin açıqlamasına əsasən, 2024–2025-ci illərin ov mövsümündə Almaniyada 130 mindən çox nutriya ovlanıb. Bu göstərici əvvəlki mövsümlə müqayisədə 14,5 min çoxdur. Birlik heyvanların ölkə üzrə sürətlə yayıldığını vurğulayaraq, populyasiyanın nəzarətdə saxlanılması və ekoloji tarazlığın qorunması üçün kütləvi ov tədbirlərinin davam etdirilməsinin vacibliyini bildirib.