ABŞ hərbçilərinin həlak olmasından sonra Vaşinqton İranla genişmiqyaslı müharibə həddindədir

ABŞ İranın hücumları nəticəsində amerikalı hərbçilərin həlak olmasından sonra Tehranla genişmiqyaslı müharibənin başlanması təhlükəsi ilə üz-üzə qalıb.

ABŞ-ın The Washington Post nəşrinin məlumatına görə, Vaşinqton İranla tammiqyaslı hərbi qarşıdurmanın astanasındadır. Qəzet yazır ki, vəziyyət son günlərdə ABŞ hərbçiləri arasında itkilərin artmasından sonra daha da gərginləşib.

Nəşrin həmsöhbəti olan amerikalı rəsmilərdən biri bildirib ki, mümkün hərbi əməliyyatların genişləndirilməsi hava hücumundan müdafiə vasitələrinin və uzaqmənzilli sursatların ehtiyatının azalması, eləcə də bölgəyə əlavə qoşun və aviasiya qüvvələrinin göndərilməsi imkanlarının məhdud olması səbəbindən çətinləşir.

"Əməliyyatları təhlükəsiz şəkildə davam etdirmək üçün kifayət qədər imkanımız yoxdur və düşünmürəm ki, Ağ ev vəziyyətin ciddiliyini tam dərk edir", – deyə mənbə bildirib.

ABŞ Silahlı Qüvvələrinin Mərkəzi Komandanlığı (CENTCOM) iyulun 19-da açıqlayıb ki, İraqda İran pilotsuz uçuş aparatından atılmış və zərərsizləşdirilmiş, lakin partlamamış sursatın partlaması nəticəsində bir ABŞ hərbçisi həlak olub.

Bundan əlavə, İranın hücumundan sonra İordaniyada aparılan axtarış əməliyyatları zamanı şəxsiyyəti hələ müəyyən edilməmiş insan qalıqları aşkarlanıb. CENTCOM daha əvvəl İordaniyada bir amerikalı hərbçinin itkin düşdüyünü, daha iki hərbçinin isə həlak olduğunu bildirmişdi.

The New York Times da yazıb ki, İranın İordaniyadakı aviabazalara endirdiyi zərbələr nəticəsində onlarla ABŞ hərbçisi yaralanıb, bir neçə hərbi helikopter isə zədələnib. Məlumata görə, Azraq şəhərində yerləşən Müvəffəq Salti aviabazasına edilən hücum zamanı təxminən 20 amerikalı hərbçi bunkerlərə sığınmağa çalışarkən xəsarət alıb.