BMT: Husilərin Səudiyyə Ərəbistanına qarşı dəniz blokadası təhdidi regionda daha geniş münaqişəyə səbəb ola bilər

Birləşmiş Millətlər Təşkilatı (BMT) Yəməndə fəaliyyət göstərən husilərin Səudiyyə Ərəbistanına qarşı elan etdiyi dəniz blokadası təhdidinin regionda daha geniş münaqişəyə yol aça biləcəyi barədə xəbərdarlıq edib.

BMT Baş katibinin sözçüsü Stefan Düjarrik jurnalistlərə açıqlamasında bildirib ki, təşkilat husilərin Səudiyyə Ərəbistanı və beynəlxalq gəmiçiliyin təhlükəsizliyi ilə bağlı yenidən səsləndirdiyi təhdidlərdən ciddi narahatdır.

"Bu məlumatları görmüşük və husilərin Səudiyyə Ərəbistanına, eləcə də gəmiçilik azadlığına qarşı yenilənən təhdidlərindən dərin narahatıq. Bu vəziyyət regionda gərginliyin daha da artması riskini yaradır", – deyə Düjarrik vurğulayıb.

BMT rəsmisi tərəfləri vəziyyəti daha da gərginləşdirə biləcək addımlardan çəkinməyə çağıraraq, regionda sabitliyin qorunmasının vacibliyini qeyd edib.