BMT-nin Livandakı Müvəqqəti Qüvvələri (UNIFIL) İsrailin nəzarətində olan Livanın cənubundakı Hula kəndində təxminən 4 ton partlayıcı maddə aşkar etdiyini açıqlayıb.

UNIFIL-in məlumatına görə, iyulun 2-də həyata keçirilən planlı marşrut yoxlaması zamanı kənddəki binalardan birində əsasən ammonium nitrat tərkibli təxminən 4 min kiloqram partlayıcı maddə olan 385 konteyner tapılıb.
Missiyanın mütəxəssisləri sonradan həmin maddələri zərərsizləşdirərək ərazi üçün yaratdığı təhlükəni aradan qaldırıblar.

AFP agentliyinə anonim danışan mənbənin sözlərinə görə, konteynerlərin üzərində ivrit dilində yazılar olub və onların partlatma işlərində istifadə edildiyi ehtimal olunur.
Hula kəndi İsrail-Livan sərhədi boyunca yerləşən və təxminən 10 kilometr dərinliyə uzanan sərhəd zonasındadır. Son münaqişə zamanı bölgəyə daxil olan İsrail ordusu burada əməliyyatlarını davam etdirir və sakinləri evlərinə qayıtmamağa çağırır.

Bölgədə gərginlik İranın dəstəklədiyi "Hizbullah" hərəkatının martın 2-də İsrailə raket zərbələri endirməsindən sonra kəskin artmışdı. Buna cavab olaraq İsrail Livanda genişmiqyaslı hava zərbələri və quru əməliyyatları həyata keçirmişdi.