Almaniya 2027-ci ildə sursat xərclərini azaldacaq

Almaniya 2027-ci il üçün müdafiə büdcəsini artırmağı planlaşdırsa da, sursat tədarükünə ayrılan vəsaiti azaltmağı nəzərdə tutur. Bu qərar ölkənin ən iri silah istehsalçılarından biri olan Rheinmetall AG şirkəti üçün əlavə çətinliklər yarada bilər.

Bloomberg agentliyinin tanış olduğu 2027-ci il dövlət büdcəsi layihəsinə əsasən, sursat alışına ayrılacaq vəsaitin 2026-cı ildəki 11 milyard avrodan 2027-ci ildə təxminən 9,6 milyard avroya endirilməsi planlaşdırılır. Bununla belə, sənəd hələ hökumət tərəfindən dəyişdirilə bilər.

Layihəyə görə, Almaniyanın ümumi müdafiə xərcləri 2030-cu ilədək əhəmiyyətli dərəcədə artırılacaq. Lakin maliyyənin digər müdafiə istiqamətlərinə yönəldilməsi artilleriya mərmiləri və digər sursat növlərinə olan tələbatın azalmasına səbəb ola bilər.

Qeyd olunur ki, Ukraynadakı müharibə fonunda sursat istehsalı Rheinmetall AG üçün əsas inkişaf istiqamətlərindən birinə çevrilmişdi. Yeni büdcə planı isə şirkətin gələcək sifarişlərinə və istehsal həcmlərinə təsir göstərə bilər.