İspaniya təhlükəsizlik orqanları Şimali Afrikadakı Seuta anklavına kütləvi şəkildə qanunsuz daxil olan miqrantlar arasında radikal islamçılar və cinayətkarların olub-olmadığını araşdırır.

El Confidencial nəşrinin hüquq-mühafizə orqanlarındakı mənbələrə istinadən verdiyi məlumata görə, xüsusi xidmət orqanları Seuta yaxınlığındakı yaşayış məntəqələrindən olan radikal islamçı və ya cihadçıların miqrant axınından istifadə edərək İspaniya ərazisinə daxil ola biləcəyini istisna etmir.

Məlumata əsasən, İspaniyanın Mülki Qvardiyası və polisi Seutaya kütləvi keçidlə bağlı videogörüntüləri təhlil edir, həmçinin şəhərdə reydlər keçirərək zorakılıq törətməkdə şübhəli bilinən şəxslərin və sərhəddə yaranmış xaosdan istifadə edərək ölkəyə daxil olmuş mümkün radikalların kimliyini müəyyənləşdirməyə çalışır.

İspaniya Daxili İşlər Nazirliyindəki mənbənin sözlərinə görə, təhlükəsizlik sahəsində yaranmış boşluğu aradan qaldırmaq üçün bütün mövcud resurslar səfərbər edilib.

Nəşr bildirir ki, hökumətin vəziyyətin sabitləşdiyini göstərməyə çalışmasına baxmayaraq, son bir həftə ərzində Seutaya daxil olan və oranı tərk edən şəxslərin dəqiq sayı hələ də məlum deyil.

Bu arada, Avropa İttifaqına üzv 22 ölkənin lideri miqrasiya böhranını müzakirə etmək üçün Aİ daxili işlər nazirlərinin təcili videokonfransının keçirilməsini tələb edib. Nazirlərin fövqəladə iclasının çərşənbə axşamı baş tutacağı gözlənilir.

Liderlərin birgə məktubunda bildirilib ki, Avropa İttifaqı kütləvi və nəzarətsiz sərhəd keçidlərinə, miqrasiyadan və digər hibrid təhdidlərdən siyasi alət kimi istifadə olunmasına imkan verməməlidir.

Məktub İtaliyanın Baş naziri Corcia Meloni və Danimarkanın Baş naziri Mette Frederiksenin təşəbbüsü ilə hazırlanıb. Sənədi Almaniya kansleri Fridrix Merts, həmçinin Macarıstan, İsveç və Polşanın baş nazirləri də imzalayıblar.

Sənəddə, həmçinin, Frontex-ə dəstəyin gücləndirilməsi və Avropa İttifaqının Mərakeşlə sərhəd təhlükəsizliyi sahəsində əməkdaşlığının genişləndirilməsi təklif olunur.

Qeyd edək ki, son günlər on minlərlə miqrant Mərakeşdən İspaniyanın Şimali Afrikadakı Seuta anklavına qanunsuz keçid edib. İspaniya hökuməti isə şənbə günü vəziyyətin "demək olar ki, normallaşdığını" açıqlayıb.