Qərbin sanksiyaları Kim Çen In rejiminin maliyyə imkanlarını məhdudlaşdırmağa yönəlsə də, hazırda Pxenyana milyardlarla dollar daxil olur.

Bloomberg Economics tərəfindən hazırlanan analitik hesabata görə, 2022–2025-ci illər ərzində Şimali Koreyanın xarici valyuta gəlirləri 22 milyard dollara qədər olub. Bu məbləğ əvvəlki dörd illə müqayisədə təxminən dörd dəfə çoxdur.

Kim Çen In hakimiyyətdə olduğu 15 il ərzində indiyədək belə böyük maliyyə resurslarına malik olmayıb. Gəlirlərin əsas mənbəyinin Rusiyaya silah-sursat və döyüş sursatlarının satışı olduğu bildirilir.

Məlumata görə, təkcə Rusiya-Ukrayna müharibəsi Kim Çen In rejiminin xəzinəsinə 14 milyard dollardan çox vəsait gətirib.

Qalan 8 milyard dollar isə Çinlə ticarət, Şimali Koreya vətəndaşlarının xaricdə işləməsi, İT xidmətləri, kiber cinayət fəaliyyəti, həmçinin qanuni və qanunsuz ixrac da daxil olmaqla digər mənbələrdən əldə edilib.

Gəlirlərin ən böyük hissəsini döyüş sursatlarının satışı təşkil edib. Mövcud məlumatlara əsasən:

9,12 milyard dollar — artilleriya mərmilərinin satışından;
2,38 milyard dollar — ağır artilleriyadan;
1,27 milyard dollar — ballistik raketlərdən;
849 milyon dollar — Şimali Koreya hərbçilərinin Rusiyaya göndərilməsindən əldə olunub.

Məqalədə qeyd olunur ki, Kim Çen In əldə olunan milyardlarla dolları ölkənin nüvə və raket proqramlarının inkişafına yönəldir.

Son iki il ərzində Şimali Koreya ən böyük hərbi gəmilərini nümayiş etdirib və ballistik raketlərini modernləşdirib.

Beləliklə, Qərbin sanksiyalarına baxmayaraq, Rusiya ilə hərbi əməkdaşlığın Pxenyan üçün əhəmiyyətli maliyyə mənbəyinə çevrildiyi bildirilir.