Kolumbiyada baş verən güclü zəlzələdən 36 saat sonra 32 yaşlı qadın dağıntılar altından sağ çıxarılıb.
BBC-nin məlumatına görə, Daniela Larqo Pereyra şəhərində uçmuş binanın dağıntıları altında qalıb. Onun xilas edilməsi 10 saat davam edən mürəkkəb əməliyyatdan sonra mümkün olub.
Xilasedicilər qadını dörd beton plitənin altında aşkar ediblər. Ona çatmaq üçün iki tunel qazılıb. Əvvəlcə yuxarıdan açılan dəlik vasitəsilə qadına oksigen verilib. Daha sonra xilasedicilər aşağıdan ikinci tunel qazaraq Larqonu dağıntıların altından çıxarıblar.
Qadının kömək çağırışını yaxınlıqda yaşayan bir sakin eşidib. Hadisə yerinə gələn xilasedicilər kiçik kamera vasitəsilə onun yerini müəyyən ediblər. Xilasetmə əməliyyatına Pereyra yanğınsöndürənləri, paytaxt Boqotadan gələn mütəxəssislər və milli polis əməkdaşları cəlb olunub.

Kolumbiya Prezidenti Abelardo de la Espriella qadının xilas edilməsini ölkəyə ümid verən xəbər kimi qiymətləndirib. Larqonun anası isə bildirib ki, 12 yaşlı oğlu evdə anasının sağ-salamat qayıtmasını gözləyir.
Rəsmi məlumatlara əsasən, 7,4 maqnitudalı zəlzələ nəticəsində azı 188 nəfər həyatını itirib, yüzlərlə insan isə itkin düşüb.

Pereyra şəhərində ən azı 92 bina dağılıb. Burada 79 nəfərin öldüyü, 15 nəfərin hələ də dağıntılar altında qaldığı, 37 nəfərin isə itkin düşdüyü bildirilir. Kali şəhərində isə 95 nəfər həyatını itirib. Çərşənbə axşamı saat 16:00-a olan məlumata görə, şəhərdə 200-dən çox insanın dağıntılar altında qaldığı, 87 nəfərin isə xilas edildiyi açıqlanıb.

Zəlzələ bazar ertəsi yerli vaxtla saat 07:34-də baş verib. Zəlzələnin episentri Çoko əyalətində yerləşən San-Xose-del-Palmar kəndinin yaxınlığında olub. Yeraltı təkanlar geniş ərazidə hiss edilib. Episentrə yaxın bölgələrdə sarsıntıların 90 saniyədən iki dəqiqəyədək davam etdiyi bildirilib.
Əsas zəlzələdən sonra bölgədə 100-dən çox afterşok qeydə alınıb.

Xilasetmə əməliyyatları davam edərkən dağıntılar altında sağ qalan insanların müəyyənləşdirilməsi üçün xüsusi texnikadan və axtarış-xilasetmə qruplarından istifadə olunur.