Yunanıstan İrandan Avropaya mümkün zərbələri qiymətləndirir: Patriot sistemi Kritə köçürülə bilər

Yunanıstan Yaxın Şərqdə vəziyyətin gərginləşməsi fonunda İranın Avropadakı ABŞ obyektlərinə mümkün zərbələri ilə bağlı təhlükəni qiymətləndirir. Yunanıstan hökuməti hava hücumundan müdafiəni gücləndirmək məqsədilə Karpatos adasında yerləşdirilən “Patriot” zenit-raket kompleksinin Krit adasındakı Suda hərbi bazasına köçürülməsi imkanını nəzərdən keçirir.

Yunanıstanın Kathimerini qəzetinin yazdığına görə, Suda bazasına təhlükənin ciddi olduğu müəyyənləşərsə, Karpatosda yerləşən “Patriot” batareyasının buraya dislokasiya edilməsi mümkündür. Məqsəd ABŞ hərbi obyektlərinin müdafiəsini gücləndirməkdir.

Afina həmçinin Kipr və Bolqarıstandakı mümkün hədəflərə zərbələr endirilməsi ilə bağlı məlumatları da araşdırır. Hazırda Kiprdə mart ayında pilotsuz uçuş aparatlarının hücumlarından sonra bölgəyə göndərilmiş iki cüt Yunanıstan F-16 qırıcısı, eləcə də “Nikiforos Fokas” freqatı qalır.

“Patriot” batareyası martın əvvəlindən etibarən Karpatos adasında yerləşdirilib. Digər hava hücumundan müdafiə sistemi isə daha əvvəl Bolqarıstanın müraciəti əsasında ölkənin şimalına göndərilmişdi. Yaxın Şərqdə vəziyyətin sabitləşməyə başladığı may ayında həmin sistem Yunanıstana qaytarılıb.

Bolqarıstan yenidən yardım üçün müraciət edərsə, “Patriot” sisteminin təkrar göndərilməsi məsələsinə Yunanıstanın Xarici Siyasət və Müdafiə Şurasında baxıla bilər.

Bu arada, Suda hərbi bazasında təhlükəsizlik tədbirləri artıq gücləndirilib. Yunanıstan Müdafiə Nazirliyi bildirir ki, təhlükə səviyyəsinin artacağı təqdirdə əlavə tədbirlər görüləcək.
Afina hazırda İran tərəfindən Yunanıstan ərazisindəki hədəflərə zərbə endirilməsi ehtimalını çox aşağı qiymətləndirir. Yunanıstan hakimiyyətinin fikrincə, potensial hava təhdidlərinin qarşısında bir neçə müdafiə və ələkeçirmə sistemi mövcuddur.

Yunanıstan hökuməti həmçinin xarici işlər naziri Georgios Gerapetritis ilə İranın xarici işlər naziri Abbas Əraqçinin son telefon danışığına və Afina ilə Tehran arasında əlaqə kanallarının yenidən aktivləşməsinə diqqət çəkir.

Yunanıstan hakimiyyətinin hazırkı qiymətləndirməsinə əsasən, İranın Avropadakı obyektlərə mümkün zərbələri ilə əlaqədar ölkə üçün yüksək təhlükə səviyyəsi müşahidə olunmur.