Britaniyanın Baş naziri Endi Börnhəmin Ukraynaya “Storm Shadow” raketlərinin istehsal texnologiyasını təqdim etmək təklifi gündəmə gəlib. Lakin “Telegraph” nəşri hesab edir ki, bu silahlar Kiyevin hazırkı əsas ehtiyaclarını tam qarşılamır.
Nəşrin məlumatına görə, Britaniya-Fransa istehsalı olan “Storm Shadow” qanadlı raketləri təxminən 300 mil, yəni 480 kilometrədək məsafə qət edə və 450 kiloqramlıq döyüş başlığı daşıya bilir. Bu raketlər əsasən düşmənin dərin arxa cəbhəsində yerləşən iri obyektlərin vurulması üçün nəzərdə tutulub.

“Telegraph” yazır ki, Ukraynada “Storm Shadow” raketlərinin istehsalının lokallaşdırılması Kiyevin uzaqmənzilli silahlara artan tələbatını qismən qarşılaya bilər. Bununla belə, nəşr hesab edir ki, Ukraynanın hazırda əsas problemi uzaqmənzilli zərbələr deyil, ballistik raketlərdən müdafiədir.

Məqalədə Ukraynanın özünün də uzaq və orta mənzilli zərbələr üçün “Flamingo” qanadlı raketləri və müxtəlif pilotsuz uçuş aparatlarından istifadə etdiyi qeyd olunur.
Nəşrə görə, Kiyev üçün daha vacib məsələ “Patriot” hava hücumundan müdafiə sistemlərinin istehsalı üçün texnologiya və lisenziya əldə etməkdir.

ABŞ Prezidenti Donald Trampın NATO-nun iyul ayında Ankarada keçirilən sammitində Ukraynaya “Patriot” sistemlərinin, o cümlədən PAC-2 və PAC-3 raketlərinin müstəqil istehsalı üçün lisenziya veriləcəyinə dair vəd etdiyi bildirilir. Lakin bu istiqamətdə hələlik konkret nəticə əldə olunmayıb.
Ukrayna Prezidenti Volodimir Zelenski isə “Patriot” sistemlərinin istehsalçısı olan “Raytheon” şirkəti ilə danışıqlar aparıldığını açıqlayıb. Söhbət Ukraynanın “Patriot” sistemlərindən buraxıla biləcək öz raketini hazırlamasından gedir.

“Telegraph” hesab edir ki, London və Parisin “Storm Shadow” texnologiyalarını Kiyevə təqdim etmək qərarı Vaşinqtona da nümunə ola bilər. Bununla belə, bunun Donald Tramp administrasiyasının ABŞ texnologiyalarının Ukraynaya ötürülməsinə razılıq verməsinə təsir edib-etməyəcəyi qeyri-müəyyəndir.

Ukrayna tərəfi müxtəlif ölkələrdən 360 ədəd “Patriot” raket-interseptoru əldə etməyi planlaşdırır. Zelenski bu hədəfin iddialı olduğunu etiraf edərək, ən azı 300 raketin alınmasına razı ola biləcəklərini bildirib.

Məqalədə qeyd olunur ki, dünyada ildə təxminən 600 belə raket istehsal edilir. Buna görə də Ukraynanın 300 ədəd “Patriot” raketi əldə etməsi belə ciddi problem olaraq qalır.

“Telegraph”un qənaətinə görə, “Storm Shadow” texnologiyasının verilməsinin Kiyev üçün real nəticə yaradıb-yaratmayacağı hələlik sual altındadır. Nəşr hesab edir ki, bu məsələdə əsas qərar London və ya Parisdə deyil, Vaşinqtonda veriləcək.