Fransada heyvan hüquqları müdafiəçiləri alp marmotlarının ovlanmasının tamamilə qadağan edilməsini tələb edirlər. Aktivistlər etiraz aksiyaları keçirməyi və imza kampaniyasına başlamağı planlaşdırırlar. Onların fikrincə, XXI əsrdə heyvanların sırf əyləncə naminə öldürülməsi ənənə ilə əsaslandırıla bilməz.

Fransada marmot ovuna mövsüm sentyabrda başlayır. Bu tarix heyvanların beş-altı aylıq qış yuxusuna getməsinə cəmi bir neçə həftə qalmış dövrə təsadüf edir. Marmotlar nəsli kəsilmək təhlükəsi ilə üzləşən növ hesab edilmir. Bununla belə, alimlər onların populyasiyalarında, o cümlədən iqlim böhranı ilə əlaqəli narahatedici dəyişikliklər müşahidə edirlər.

Marmotlar ailə qrupları halında yaşayır. Yayın sonunda qışa hazırlaşan heyvanlar intensiv qidalanaraq yağ ehtiyatı toplayır və çəkiləri 8 kiloqrama qədər çata bilir. Fransada hər il orta hesabla 1 000-ə yaxın marmot ovlanır.

Savoie Heyvanlara Ədalət Assosiasiyası (AJAS) iki ildir marmot ovuna qarşı mübarizə aparır. Təşkilatın prezidenti Polin di Nikolantoniya bildirir ki, marmot artıq Savoie və ümumilikdə Alp regionunun simvollarından birinə çevrilib. Onun sözlərinə görə, bir çox fransız bu heyvanların hələ də qanuni şəkildə ovlanmasına təəccüblənir.

Alimlər iqlim dəyişikliyinin marmotlara təsirindən də narahatdırlar. Fransanın Milli Elmi Tədqiqatlar Mərkəzindən Kristofer Bonenfant və həmkarı Rebekka Qarsiya Alp dağlarında bu heyvanları araşdırırlar. Onların müşahidələrinə əsasən, marmotların sosial qrupları daha qeyri-sabit olur, dominant fərdlər daha tez-tez dəyişir, dişilər isə daha az bala verir. Bu dəyişikliklər heyvanlar arasında qarşıdurmaların artması ilə müşayiət olunur.

Marmotlar ekosistemdə də mühüm rol oynayır. Onlar qartal, tülkü və porsuq kimi yırtıcıların əsas qida mənbələrindən biridir. Bundan əlavə, marmotların geniş yuva sistemləri torpağın havalanmasına kömək edir.

Hazırda Fransanın bəzi bölgələrində marmot ovuna müəyyən müddət və ovlanacaq heyvanların sayı ilə bağlı ciddi məhdudiyyətlər çərçivəsində icazə verilir. Ölkənin Milli Ovçular Federasiyası isə növün təhlükə altında olmadığını, əksinə, sayının artdığını bildirir. Federasiyanın mövqeyinə görə, ovun tamamilə qadağan edilməsi üçün əsas yoxdur.

Heyvan hüquqları müdafiəçiləri isə Fransada marmot ovuna ümummilli qadağa qoyulmasını istəyirlər. Onlar İtaliyanın təcrübəsini nümunə göstərirlər. İtaliyada marmot ovuna 1992-ci ildə qadağa qoyulub.

Aktivistlərin fikrincə, əvvəllər marmotlar ət və xəz əldə etmək üçün ovlanırdı. Bu gün isə onların vurulmasının əsas məqsədi artıq ehtiyac deyil, əyləncədir.