Kolumbiya prezidenti Abelardo de la Espriella ictimai yerlərdə qeydiyyatdan keçmiş odlu silahların daşınmasına tətbiq edilən təxminən 10 illik məhdudiyyəti ləğv edən fərman imzalayıb.
Prezident qərarı ölkədə cinayətkarlıqla mübarizə siyasəti çərçivəsində atılan addım kimi təqdim edib. O bildirib ki, cinayətkarların ağır silahlarla silahlandığı halda qanuna tabe olan vətəndaşların özlərini müdafiə edə bilməməsi düzgün deyil.
Sözügedən məhdudiyyət 2015-ci ilin dekabrında, o vaxtkı prezident Xuan Manuel Santosun dövründə tətbiq olunub. Əvvəlcə qərarın yalnız Milad və Yeni il bayramları zamanı qüvvədə olması nəzərdə tutulsa da, sonradan hər il uzadılıb. Məhdudiyyət Santosdan sonra prezident olan İvan Duke və Qustavo Petronun hakimiyyəti dövründə də qüvvədə saxlanılıb.

Yeni fərmana qədər silah gəzdirmək üçün qüvvədə olan icazəsi olan şəxslər belə, əlavə dövlət icazəsi olmadan odlu silahı evdən çıxara bilmirdilər.

Yeni qaydalara əsasən isə qeydiyyatdan keçmiş silahın sahibi əsas icazəsi qüvvədə olduğu müddətdə əlavə icazə almadan silahı özü ilə daşıya biləcək. İspaniyanın El País qəzetinin məlumatına görə, dəyişiklik təxminən 700 min silah sahibinə şamil olunacaq.

Prezident vurğulayıb ki, bu qərar silahların sərbəst şəkildə daşınması anlamına gəlmir. Silah əldə etmək və ona sahib olmaq üçün mövcud sərt tələblər qüvvədə qalır.
Qərar ölkədə tənqid də olunub. “Yaşıl Alyans” partiyasından senator Ariel Avila bunu ciddi səhv adlandırıb. Onun sözlərinə görə, qanuni şəkildə qeydiyyata alınmış silahlar nəticədə cinayətkarların əlinə keçə bilər.

Prezident isə təhlükəsizliklə bağlı narahatlıqları rədd edib. Onun sözlərinə görə, hüquq-mühafizə orqanları qanunsuz silahlara qarşı mübarizəni davam etdirir və ilin əvvəlindən 15 mindən çox silah müsadirə edilib. De la Espriellanın iddiasına görə, müsadirə olunan silahların əksəriyyəti FARC-dan ayrılmış silahlı qruplara və “Klan del Qolfo” adlı cinayətkar qruplaşmanın üzvlərinə məxsus olub.

Prezident fərmanı imzalayarkən bunun seçki kampaniyası zamanı verdiyi vədi yerinə yetirdiyini bildirib.