Avropa Komissiyasının Prezidenti Ursula fon der Lyayen cümə axşamı Parisdə keçiriləcək kosmik sammitdə çıxış edərək Avropa İttifaqından məyus olan fransızları birliyin üstünlüklərinə inandırmağa çalışacaq. Politico yazır ki, bu addım Fransada avroskeptik əhval-ruhiyyənin kəskin artması və qarşıdan gələn prezident seçkiləri fonunda atılır.

“Hazırda vəziyyət ‘qırmızı həyəcan’ səviyyəsindədir. Fransanın Aİ-yə qarşı indiki qədər mənfi münasibətdə olduğunu heç vaxt görməmişəm”, – avropalı məmurlardan biri nəşrə bildirib.

Onun sözlərinə görə, hazırda fransızlar üçün əsas “qorxulu mövzular” Brüssel və miqrasiyadır. Bununla belə, Politico qeyd edir ki, fon der Lyayenin çıxışı Brüsselin gözlədiyi qədər güclü avropayönlü təsir yaratmaya bilər.

Avropa Komissiyasının rəhbəri Fransa Prezidenti Emmanuel Makronun təşkil etdiyi beynəlxalq kosmik sammit çərçivəsində Parisdəki Qran-Paledə çıxış edəcək.

Nəşrin məlumatına görə, fon der Lyayenin çıxışının əsas mesajı ondan ibarət olacaq ki, məhz Avropa İttifaqının sayəsində Avropa ölkələri böyükmiqyaslı layihələri həyata keçirə və digər dünya gücləri ilə rəqabət apara bilirlər.

Avropa Komissiyası rəsmi olaraq bildirib ki, fon der Lyayen Aİ-nin kosmik sahədə prioritetlərini təqdim edəcək. Brüssel Avropanın rəqabət qabiliyyətinin, təhlükəsizliyinin və dayanıqlılığının təmin olunmasında kosmosun roluna xüsusi diqqət yetirməyi planlaşdırır.

Politico qeyd edir ki, Fransada siyasi vəziyyət Brüssel üçün əlverişsiz olaraq qalır. Sağçı siyasətçi Marin Le Pen gələn il keçiriləcək prezident seçkiləri ərəfəsində keçirilən sorğularda liderlik edir. Avroskeptik Jan-Lyuk Melanşonun da ikinci tura çıxmaq üçün real şansları olduğu bildirilir.

Nəşrin qiymətləndirməsinə görə, Le Penin mümkün qələbəsi Avropa İttifaqının gələcəyi üçün ciddi nəticələrə səbəb ola bilər.