ABŞ-ın Havay ştatında “Louell” qasırğasının yaratdığı güclü külək və dalğalar ciddi fəsadlara səbəb olub. Təbii fəlakət nəticəsində azı iki nəfərin öldüyü bildirilir.

Associated Press-in məlumatına görə, Kauai adasında xilasedicilər çərşənbə günü sahilə yaxın ərazidə 74 yaşlı kişinin meyitini aşkarlayıblar. Polis onun ölümünün fırtına nəticəsində yaranan güclü su axını ilə əlaqəli olduğunu ehtimal edir.
Oahu adasında isə digər bir kişi iri ağacın düşməsi nəticəsində həyatını itirib. Ağac onun olduğu çadırın üzərinə aşıb. Havay qubernatoru Coş Qrin bildirib ki, ölən şəxs parklardan birində yaşayan evsiz insan olub.
“Louell” çərşənbə gecəsi Havay adalarının yaxınlığından keçib. Qasırğanın mərkəzi okean üzərində qalsa da, dağıdıcı küləklər mərkəzdən uzaq ərazilərə də təsir edib.

Fırtınanın ən çox zərər vurduğu ərazilərdən biri Kauai adası olub. Burada okean sahilində yerləşən bir sıra kurort komplekslərinə ziyan dəyib.
Lanai adasında isə yük limanının fəaliyyəti iflic olub. Sözügedən liman ada əhalisinin ərzaq və digər zəruri məhsullarla təminatında mühüm rol oynayır.

Havay qubernatoru Coş Qrin ABŞ Prezidenti Donald Trampa müraciət edərək Kauai və Maui adalarında böyük təbii fəlakət rejiminin elan olunmasını istəyib. Bu qərarın federal yardımın zərərçəkən ərazilərə daha sürətli çatdırılmasına imkan verəcəyi bildirilir.

Hazırda “Louell” qasırğası zəifləyərək tropik fırtınaya çevrilib və açıq okean üzərində qərbə doğru hərəkətini davam etdirir.
Bu arada Sakit okeanda daha bir tropik fırtına – “Norbert” formalaşıb. ABŞ Milli Qasırğa Mərkəzinin məlumatına görə, “Norbert” Meksikanın Aşağı Kaliforniya yarımadasının cənub ucundan təxminən 1100 kilometr cənub-qərbdə yerləşib.

Fırtına saatda təxminən 64 kilometr sürətlə qərbə doğru hərəkət edir. Hazırda onun quru əraziləri üçün təhlükə yaratmadığı bildirilir. Sinoptiklər yaxın günlərdə “Norbert”in tədricən güclənəcəyini proqnozlaşdırırlar.