MKİ Klintonu Ben Ladenin ABŞ-a hücum planları barədə xəbərdar edib

ABŞ Mərkəzi Kəşfiyyat İdarəsi (MKİ) hələ 1998-ci ilin dekabrında prezident Bill Klintonu Usamə bin Laden və tərəfdarlarının ABŞ ərazisində terror aktları hazırladığı barədə məlumatlandırıb.
Bu barədə 11 sentyabr terror aktlarının 25-ci ildönümü ərəfəsində məxfilikdən çıxarılan kəşfiyyat sənədində qeyd olunur.

4 dekabr 1998-ci il tarixli sənəd Klinton üçün gündəlik prezident brifinqinə daxil edilib. Sənəddə bin Laden və onun müttəfiqlərinin ABŞ-da hücumlar, o cümlədən amerikalı sərnişin təyyarəsinin qaçırılması planları hazırladığı bildirilir.
Kəşfiyyat məlumatına görə, terrorçuların mümkün məqsədlərindən biri həbsdə olan islamçıların azad edilməsinə nail olmaq olub. Onların arasında şeyx Ömər Əbd ər-Rəhman və Ramzi Yusifin də olduğu qeyd edilir.

Sənəddə həmçinin bildirilir ki, “Cəmaat əl-İslamiyyə” qruplaşması 1998-ci ilin oktyabrının sonlarına doğru ABŞ ərazisində əməliyyat keçirmək üçün plan hazırlayıb. Lakin həmin plan sonradan dayandırılıb.

MKİ digər məlumatlarda qruplaşmanın liderlərindən Məhəmməd əl-İslamblinin 1998-ci ilin sentyabrında yaxın həftələr ərzində ABŞ sərnişin təyyarəsini qaçırmaq planı hazırladığını da müəyyən edib.
Məxfi sənəddə diqqətçəkən başqa bir detal da yer alıb. Terrorçuların əməliyyat qrupunun iki üzvünün Nyu-York hava limanlarından birində təhlükəsizlik yoxlamasından maneəsiz keçə bildiyi bildirilib.

Kəşfiyyat məlumatında bin Ladenin 1998-ci il dekabrın 20-dək ABŞ-a məxsus sərnişin təyyarələrini qaçırmaq planlarının olduğu da qeyd olunub.

Xatırladaq ki, 2001-ci il sentyabrın 11-də “Əl-Qaidə” terror qruplaşmasının üzvləri dörd sərnişin təyyarəsini ələ keçirib. Təyyarələrdən ikisi Nyu-Yorkdakı Dünya Ticarət Mərkəzinin qüllələrinə, biri Pentaqon binasına çırpılıb. Dördüncü təyyarə isə Pensilvaniya ştatının Şanksvill şəhəri yaxınlığında yerə düşüb.

11 sentyabr terror aktları nəticəsində ümumilikdə 2977 nəfər həlak olub.