Yəmənin şimalında fəaliyyət göstərən şiə hərbi-siyasi hərəkatı – “Ənsar Allah” (husilər) Bab əl-Məndəb boğazı yaxınlığında və Qırmızı dənizin qərb sahilində yerləşən əsas yaşayış məntəqələrinə nəzarəti ələ keçirib.
Hərbi mənbənin məlumatına görə, husilər boğazın ən dar hissəsində yerləşən strateji əhəmiyyətli Perim adasını da ələ keçiriblər. Hökumət qüvvələrinin adanı tərk etməsindən sonra Yəmən ordusunun bölmələri adanın cənub hissəsinə geri çəkilib.
Husilərin silahlı qayıqları Qırmızı dənizdəki Haniş arxipelaqına da desant çıxarıb. Arxipelaqa Böyük Haniş, Kiçik Haniş və Cəbəl-Züqar adaları daxildir. Bu ərazi Qırmızı dənizin cənub hissəsində mühüm dəniz nəqliyyatı marşrutlarının üzərində yerləşir.
Mənbənin bildirdiyinə görə, “Ənsar Allah”ın hərbi-dəniz qüvvələri sahildən təxminən 25 dəniz mili məsafədə yerləşən arxipelaqa nəzarəti tam təmin edib. Burada yerləşən 260 hərbçi və zabit əsir götürülüb. Onların bir neçə saat davam edən radio danışıqlarından sonra təslim olduğu və Xodeyda sahilinə aparıldığı bildirilir.

Bu hadisədən əvvəl husilər Taiz vilayətinin qərbində yerləşən strateji Əl-Moxa rayonunu və Bab əl-Məndəb boğazına çıxışı olan limanı da ələ keçiriblər. Qrup bundan əvvəl Yəmənin qərbindəki Xodeyda vilayətində nəzarəti möhkəmləndirmişdi.
Məlumata görə, husilər iyulun ortalarından etibarən Yəmən hökumət qüvvələrinə qarşı hərbi əməliyyatları intensivləşdirib. Bu, dörd illik fasilədən sonra bölgədə hərbi qarşıdurmanın yenidən kəskinləşməsi kimi qiymətləndirilir.