Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas Rusiya Prezidenti Vladimir Putin və xarici işlər naziri Sergey Lavrovla telefon danışığına hazır olduğunu açıqlayıb.
Kallas Finlandiyanın Yle telekanalına müsahibəsində bildirib ki, Putin və ya Lavrov onunla əlaqə saxlasa, telefon zənginə cavab verəcək.

“Əlbəttə, belə bir imkan yaranarsa, danışacağam”, – deyə Kallas qeyd edib.
Bununla belə, Aİ-nin baş diplomatı hesab edir ki, Avropa İttifaqı hazırda Moskva ilə Rusiyanın şərtləri əsasında dialoqa başlamamalıdır. Onun sözlərinə görə, Aİ Ukraynanı dəstəklədiyinə görə Rusiya ilə Ukrayna arasında tamhüquqlu vasitəçi rolunu oynaya bilməz.

Kallas ABŞ nümayəndələri Jared Kuşner və Stiv Uitkoffun Rusiya və Ukraynaya səfərlərini də tənqid edib. O bildirib ki, Vaşinqtonun Moskva ilə danışıqlar aparan nümayəndələri Rusiyanın danışıqlar taktikasını daha yaxşı bilməlidir.
Kallasın fikrincə, Moskva danışıqlarda maksimal tələblər irəli sürür, daha sonra təzyiq göstərərək qarşı tərəfin güzəştə getməsinə çalışır. O hesab edir ki, Rusiya əvvəl sahib olmadığı məsələləri tələb edir, daha sonra isə Qərbin qarşılıq olaraq müəyyən güzəştlər təklif etməsini gözləyir.

Aİ rəsmisi xəbərdarlıq edib ki, müharibəni mümkün qədər tez başa çatdırmaq cəhdi Ukraynaya ərazi və əhali itkisi ilə bağlı təzyiqlərə səbəb ola bilər.

“Bu, asan yoldur. Amma heç vaxt ədalətli və davamlı sülhə gətirib çıxarmayacaq”, – Kallas deyib.
Kallas Finlandiyanın Sovet İttifaqı ilə müharibələr zamanı yaşadığı təcrübəni də xatırladıb. Onun sözlərinə görə, təcavüzkarın hücuma görə mükafatlandırılmasına yol vermək olmaz.

Aİ-nin xarici siyasət rəhbəri Rusiyanın dondurulmuş aktivlərinin geri qaytarılmasını da tələb edə biləcəyini bildirib. Onun fikrincə, Moskvanın belə tələbləri qarşılıqsız təmin edilməməlidir. Kallas hesab edir ki, Rusiyanın maksimal tələblərinə qarşı Avropa İttifaqı da öz maksimal tələblərini irəli sürməli və danışıqlarda daha balanslı mövqe formalaşdırmalıdır.

Kallas həmçinin bildirib ki, Sergey Lavrovla daha əvvəl eyni masa arxasında görüşüb. Onun sözlərinə görə, Aİ-nin mövqeyini Lavrova birbaşa, o cümlədən ASEAN və G20 tədbirləri çərçivəsində çatdırıb.