Hind okeanının cənub-qərb hissəsində, Mavriki sahillərinin yaxınlığındakı dərin sularda elmə məlum olmayan yeni köpəkbalığı növü aşkarlanıb.

IFLScience-ın məlumatına görə, yeni növə Etmopterus bulbosus adı verilib. Bu ad köpəkbalığının iri, soğana bənzər burnu ilə əlaqədardır.

Yeni növ yalnız bir nümunə əsasında müəyyən edilib. Dişi köpəkbalığı 400–500 metr dərinlikdən tral vasitəsilə səthə çıxarılıb. Onun burun ucundan quyruğunun sonuna qədər uzunluğu cəmi 21,5 santimetr olub. Bu səbəbdən növ “böyüknazik işıqlanan köpəkbalığı” kimi xarakterizə edilir.

Tədqiqatçılar yeni növü Etmopterus cinsinə aid ediblər. Bu cinsə hazırda 43 məlum növ daxildir. Alimlərin fikrincə, E. bulbosus E. pusillus qrupuna daxil olsa da, bəzi morfoloji xüsusiyyətlərinə görə E. sentosus növünə də bənzəyir.

Yeni növün bədəni əsasən qəhvəyi-qara rəngdədir və üzərində yüngül bənövşəyi çalar müşahidə olunur.

Beynəlxalq Təbiəti Mühafizə İttifaqı bu cinsə daxil olan 43 növdən 40-nın qorunma vəziyyətini qiymətləndirib. Onlardan 36 növ “ən az narahatlıq doğuran”, 3 növ “məlumat çatışmazlığı olan”, bir növ isə “həssas” kateqoriyasına daxil edilib.

Mütəxəssislər bildirirlər ki, bu köpəkbalıqlarının əksəriyyəti dəniz dibində aparılan tral əməliyyatlarının çatdığı dərinliklərdən daha aşağıda yaşadığı üçün balıqçılığın mənfi təsirindən böyük ölçüdə qorunur.